› 選擇地區
三藩市
紐約
洛杉磯
其他美國地區
香港 台灣 北美
 
2020年07月13日

曾國衞的「講嘢安全法」 - 林夕

「你做咗官呀,講嘢咁多可能,應該,看實際情況。問你得唔得,得就得,唔得就話我聽唔得。」係,我唔溫文嗰時都好惡吓,昨天對朋友在通話中親切地呼喝。朋友沒反感,應該有可能有機會跟我一樣,想起政制及內地事務局長曾國衞。

曾國衞謂:泛民初選目標希望爭取立會過半議席,意欲否決《財政預算案》,「有機會」違反國安法。俗語所謂嚇鬼咩,其實個意思即係嚇唔到人,生而為人,的確要比魍魎魑魅大膽,對官話無須過份猜測。希望立法會行使庚子年七月之前憲制賦予「基本法」權力而已,會犯法,還一連犯了二十、二十二、二十九條,嚴重干擾、阻撓、破壞中央或特區政府依法履行職權。

噢,嚴重到呢,呢啲咪過份解讀囉,哦,政制局長喔,立法會噢,咁唔好話民間自己玩吓初選當裝飾品嘞,立會咪變成係裝飾品?

這位現任政制局長,升官前以辦公室擺放習近平主席瓷照紀念盤馳名,有記者過份猜測,問是否要表忠心,曾國衞謂:「這純粹是我辦公室的佈置,大家無須就此過分解讀。 」

係囉,佈置而已。辦公室把習大大肖像當佈置,不是當明星偶像崇拜,即係裝飾品啦,裝飾吓氣氛啫。問到是否跟建制派議員走得好埋,他又說:「跟鄭泳舜偶遇打個招呼啫,大家唔駛就此作過份猜測喎。」對中聯辦會否受基本法二十二條規管,他則說兩辦出聲明給意見亦「無可厚非」。

OK,咁就得嘞,得咗!政制及內地事務局長呢種「講嘢安全法」,第一二三條充分保障「大家免着驚」的權利。

初選?泛民用來當裝置藝術啫,第一天就二十幾萬人,第一條有寫明:「不必過份解讀。」

貼紙?時代夾萬?裝置吓商場啲氣氛啫,香港加油、光復香港?第二條寫明:「不必過份解讀」喎。

行街街?平常心啦,做吓人肉佈置啫,又是行出咗界,第三條寫明:「無可厚非」。

唱吓歌仔?我認為大家「無須過份解讀」旋律的動機,音樂拯救心靈,「不必過份猜測」未唱出來的歌詞內容,客串做busker,「無可厚非」囉,慶祝國安法吖嘛。

最大的恐懼,正是來自恐懼本身吖嘛。看實際情況,可能、應該唔駛過份解讀猜測未來的恐怖局面。

林夕
電郵 :
linxiapple@gmail.com

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2021 AD Internet Limited. All rights reserved. 版權所有 不得轉載