› 選擇地區
三藩市
紐約
洛杉磯
其他美國地區
香港 台灣 北美
 
2020年06月02日

唔希罕 - 鄧達智

廣東話啜核,精緻幾個字形容恰到妙處;「唔希罕」三個字用得其所效用可大可小。小至香港疫症初期,師奶仔們在百佳惠康爭口罩M巾廁紙,出手遲咗三十分之一秒,情勢不及人強,死不瞑目誓不放手?把鬼!

一番垂死掙扎眼見大勢已去,只好詐作大方:好叻咩……超,唔希罕!

面對英國官員眾說紛紜──

準備給予35萬BNO護照持有人英國公民身份;BNO護照持有人留英時限,從半年延長至一年;考慮中,考慮中……RP口音官腔口吻繼續英式「考慮」中……

面對五時花六時變英國天鬼婆面,誰個BNO持有人夠膽識,行出來做代表:唓!又咁又咁好巴閉咩?

97前英國人老早便應該將所有非British Passport轉為正式英國公民護照,安撫大喊God Save The Queen一眾子民並收歸國有;當年冇做,不久前面對高舉米字旗到英國領事館請願的熱血港人又被驅趕,底底面面都被明眼人看到英國官員特色:偽善!

行前驚死行尾驚賊,作為前宗主國面對急於認祖歸宗British Subjects未免拖拖拉拉有欠明朗……唔希罕呀!

嗱,面對即將出爐「港區國安法」,上面這句「唔希罕」實屬千斤重之重量級。

私人事件方面,「唔希罕」用在感情、愛情當然至多,挽狂瀾未果,迫於無奈又係拋低嗰一句:好叻咩,唔希罕!

靜觀其變以退為進的人有福了,沉得着氣,將一切妒火中燒藏於心底,切忌金句「唔希罕」宣之於口,以行動鋪排於滿面不在乎之間擊退對手……

話說幾廿年前,即是大清律例男人大搖大擺隨時抱擁三、五個女人而合情合理合法;長輩面對比自己年輕起碼過十年,明顯隨時比十八廿二還要小的小三摸上門,宣佈不介意「做細」!

沒有一般蠢女人一哭二鬧三上吊,反而收集所有能夠擳得出嚟的笑容為小三臉皮貼金:妹妹,有眼你見,我哋屋企就係咁大,點止三年抱兩?根本年年報喜,有你幫手肚皮終於有得唞一唞。細路多,你都要幫手湊,家頭細務齊分享。大床得一張,可以讓畀你同大少瞓,我冇所謂瞓帆布床都冇所謂。兩姊妹相稱,如果第日屋企多幾個小四、小五報到,你做老二,到時咪有身份囉!

得到大少奶深明大義兼嘉獎,身穿白恤衫工人吊帶褲的小三立即捋起衫袖抹地洗衫湊細路直至天黑,吃過鹹魚青菜晚飯,知難而退急急腳不辭而別。

所以話,不宣於口至緊要,心中無數暗中鋪排「唔希罕」,睇吓邊個至長命,得到最後一啖笑!

鄧達智
電郵 :
chiuou@gmail.com

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2021 AD Internet Limited. All rights reserved. 版權所有 不得轉載