移民與二次逆向回流有冇雷公公願景的三十萬人咁多？心裏冇譜，天打雷劈，唔敢亂篤。身邊朋友，計劃走、走緊的，都在議論走後種種，越講越high。那末，好撚鍾意香港的我們，係時候向道別飯敍的兄弟說不，扚起心肝，諗深一層，鋪好自己條山路小徑，念念不忘近萬個被捕者，試吓咁：
1.私學摩斯密碼，密碼作詞寫詩，問鼎2047文學獎。
2.參加禁書尋寶遊戲，禁書被抄家，放在哪裏最安全？邊隻密實袋最強？香港人自然升級做禁書達人。
3.書商印刷廠自我審查，明嘅。蘋果就算出成疊白紙，一樣值得捧讀，留白的報紙，止到眼淚。日本推理小說天后宮部美幸N年前那本「英雄之書」，個名起得好，英雄莫問「出處」，山旮旯印山寨紙，有得諗。
4.黑警見到舉白紙照拉，逼你舉白旗投降。雖然白色恐怖極，但食腦嘅，舉白襪仔，兆波手足，收到！
5.湖北女作家方方為武肺而寫的「武漢日記」持續寫了60天，出埋書。香港人的「国安法日記」從2020年71寫到60日、60個月，俾啲堅忍，寫他媽個60年！
