林鄭紆尊降貴落工聯會，扮演一名「慰問」大陸港人的接線生，當然做戲咁做，我也睇戲咁睇。一如所料，這是齣毫無誠意的爛片，連劇本也沒有，任憑演員即場爆肚。
特首提電話，以機械人腔調說：「阿黃生呀，我係特首呀，你而家喺深圳住梗呀？」一開口就知對方住深圳，表示工聯會早已安排妥當。正常人通常會問：「近排點呀？」誰知下一句林鄭已急不及待，老實不客氣硬銷工聯會：「我哋同工聯會合作，多謝佢哋呢，因為佢哋喺內地有服務中心，可以幫我哋啲香港居民呢，送藥畀啲屋企人。」這句對白你細味一下，就發覺非常奇怪。
「我哋」指誰呢？按理該指政府，即是說，特首打電話給住在深圳的黃生，告訴他政府很感謝工聯會；但下一句卻說「我哋啲香港居民」，似乎「我哋」指香港居民，即是說，特首打電話給住在深圳的黃生，告訴他香港人很感謝工聯會。究竟我看了什麼？
完全可以想像出騷前，工聯會「嗰個女仔」麥美娟已跟特首談好：「嗱，陣間出鏡，記住要提『多謝工聯會』五個字呀吓，唔好話我依家唔提你呀！」自稱「年年考第一」的考試機器林鄭，知道自己只要唸出「多謝工聯會」五字就可「得分」，於是連正常電話禮儀都省掉，直接跳到model answer。大概只有香港考試制度，才可產出林鄭這種奇葩。
最遺憾是爛片沒有彩蛋，我很想知道：「嗰個女仔」看了《我係特首》後，會欣然豎起大拇指說「Good take」，抑或重演當日在禮賓府破口大罵的畫面：「你其實仲可以再假啲㗎仆街！你連問候都冇句，叫人點信呀？現在話多謝就多謝，你畀少少誠意鋪排吓得唔得？我啲兄弟又被人×啦！」
認真思考：做這場騷有用嗎？你有你笑，我深信有些香港人確會感恩。最近才聽到朋友提及父母的投票原則：他們多年來投建制派，爸爸的理由是建制派免費給他們量血壓，媽媽是因為那議員跟她同姓。我問：「只因為同姓？還有其他原因嗎？」「沒有，只是同姓。」現實往往超乎大家想像，工聯會也有他們的市場。
