› 選擇地區
三藩市
紐約
洛杉磯
其他美國地區
香港 台灣 北美
 
2009年01月16日

埋怨母校係中中 - 左丁山

一位大學畢業生出身中中,適值中學教學語言微調,引起爭論,於是喜歡做「對比新聞」嘅記者,就搵到呢位畢業生出嚟講幾句,目的顯而易見,就係要說明讀完中中升大學,會好辛苦,好蝕底,從而攻擊母語教學。果然,呢位畢業生話好後悔昔年揀咗中中,呼籲啲師弟師妹要揀英中。有此新聞人辦,記者想數臭中中,就十分容易。
呢位畢業生不知大學成績如何。一般只識得埋怨,不懂向母校感恩之人,通常成績不會太好。乜唔係啫,掛住怨母校(中中),怨自己揀錯,就唔會怨自己在大學點解唔加倍努力嘅嘞。讀完中中入大學,當然要加緊學習英語,適應新需求,因為讀一流學術論文(中文、中史、中國哲學除外),好少係用中文寫嘅。但只要自己肯下苦功,少啲去玩,少啲去參加太多課外活動,苦讀英語一兩年,就可以克服困難,唔使怨天怨地。讀完中中入中文大學,先至開始接觸大量英文書嘅學生,例子多到數唔晒,知名度最高嘅張敏儀自寶血中學入中大讀英文系,你話辛唔辛苦?幾時見張大姐埋怨錯入寶血(中中),中華廠商聯合會副會長羅富昌係成功工業家,佢自金文泰中學入中大讀地理系,辛唔辛苦?香港大學(英語大學)校長徐立之出自巴富街官中(今何文田官中)入中大讀生物系,有冇埋怨母校之母語教學?港鐵行政總裁周松崗爵士自培正中學到美國威斯康辛大學,成為世界級行政人才,喺英國打工打到封爵,佢有冇埋怨培正用中文教書呀?相同例子之多,不勝枚舉,數唔晒。
讀完英中讀大學,初頭係着數啲,但未必可以由頭帶到尾。舉個例,昔年一位寶血女生入咗中大讀經濟,初讀Samuelson,幾乎想喊,因為好似讀字典,每一頁都有幾十個生字要查字典,而同班來自英中之學生,就睇書睇得好快,讀會計學原理呢?又係想喊,因為debit,credit,accrual為何物,完全唔識。呢,唔好理,四年後畢業,佢與另一位培正女生得到經濟系一級榮譽,來自英中名校嘅一位學生攞三級榮譽。讀書事在人為,讀完大學而埋怨母校係中中,不長進也!

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2021 AD Internet Limited. All rights reserved. 版權所有 不得轉載