› 選擇地區
三藩市
紐約
洛杉磯
其他美國地區
香港 台灣 北美
 
2020年02月18日

【操盤手札記】疫情為錢搬龍門 - 割柑人

武漢肺炎確診數字好神奇,衞健委一周內先後透過「檢測」同「診斷」修改「確診」定義,目的係為咗執靚盤數。 資料圖片

十步殺一人,千里不留行!武漢肺炎爆發兩個月嚟,奪走1,775條人命,中國佔1,770人,香港、台灣、日本、菲律賓、法國各1人。中國死亡數字有幾真?外媒引述捷克氣象網站Windy數據,指武漢焚屍令二氧化硫超標,網民推算焚屍超過1.4萬!

確診數字亦好神奇!湖北以外地區新增確診連跌13日,點解?皆因衞健委2月6日修改標準,檢測陽性卻未發病不列確診。2月9日又改,喺湖北加入臨床診斷類別,即檢測陰性卻有肺炎;2月13日更將之歸入確診,令湖北單日新增近1.5萬宗確診!

衞健委一周兩度搬龍門,先後透過「檢測」同「診斷」修改「確診」定義,前者營造疫情趨緩假象,後者則營造病死率低假象。按此計算,病死率為2.1%,低過按世衞數據計嘅2.9%,更低過早前喺預印期刊medRxiv發表嘅3.06%,盤數即刻靚晒。

執靚盤數,為乜?為復工!習近平開晒聲,抗疫不忘經濟。而且,美國貿易代表署剛成立爭議解決辦事處,落實中美首階段貿易協議,上周六啟用。中國簽署貿協,目的係buy time,但兩年啃多2,000億美元美國貨,疫情雖未過,唔復工點啃?

抗疫有晒劇本,金融市場跟黨走。周一,人行下調MLF利率,變相減息,帶動中港股市分別再升2.3%同0.5%。恒指收27959,成功回補第一個裂口,有望挑戰第二個裂口28700;不過,企穩28000關前,回吐壓力隨時再現,初步支持27600。

阿里巴巴(9988)日前派季度成業表,收入同盈利都好過預期;不過,主席預告面對疫情,今季業績將受衝擊。有危就有機,阿里智能移動辦公平台釘釘(DingTalk),上周躍升App Store下載榜首,首超微信。阿里中線看好,可逢低吸納。

割柑人
本欄逢周二刊出

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2020 AD Internet Limited. All rights reserved. 版權所有 不得轉載