› 選擇地區
三藩市
紐約
洛杉磯
其他美國地區
香港 台灣 北美
 
2020年03月03日

【操盤手札記】咪當儲局係龍珠 - 割柑人

聯儲局主席鮑威爾上周五暗示減息。 資料圖片

武漢肺炎全球蔓延,60國感染,六大洲淪陷,南極洲成最後淨土。世衞總幹事譚德塞上周初話「未到大流行」,隔日話「令人擔憂」,隔日又話「可能演變大流行,但沒數據顯示已達」。咩玩法?破位、後抽、再探?全球慌失失,股市亦然。

市場擔心疫情為經濟帶嚟嘅風險上升,風險資產備受壓力,美股三大指數上周都跌超過一成,陷入技術調整區。點解咁慌?疫情只係元凶之一,幫兇仲有:一、衰退風險加劇;二、美股估值過高;三、美債長息破底;四、美國大選左翼抬頭。

美國10年期債息低見1.031厘,再創歷史新低,債息倒掛嚴重,經濟衰退響號;加上美股free fall,甚有市場迫聯儲局減息味道,更似乎得米,聯儲局主席鮑威爾上周五就暗示減息。利率期貨顯示,3月減息機會達100%,問題係0.25厘定0.5厘。

聯儲局減息可以退疫救市?你當聯儲局係《龍珠》咩(玄學家李居明話電視台同播《龍珠》可以化解疫情)!減息以至減稅能否挽救經濟,要睇疫情能否受控,若然失控,全球大流行,咁全球供應鏈斷鏈,莫講話放水,神仙都難救。

中國2月製造業PMI創紀錄新低,隨時全球攬炒。不過,隨着美股成功倒迫聯儲局減息,市場憧憬全球聯手行動,周一中港股市分別反彈3.1%同0.6%。恒指收26291,按黃金比率0.382同0.5計,反彈可望分別回試26778同27022。

面對反彈市,宜揀硬淨股,例如做獨市生意嘅港交所(388)。港股舊年日均成交額為872億元,隨着中國推行較寬鬆嘅貨幣政策應對疫情,流動性明顯增加,野村估計,港股今年日均成交額達1,060億元,港交所可望受惠,不妨留意。

割柑人
本欄逢周二刊出

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2020 AD Internet Limited. All rights reserved. 版權所有 不得轉載