› 選擇地區
三藩市
紐約
洛杉磯
其他美國地區
香港 台灣 北美
 
2020年03月10日

【操盤手札記】疫戰未過 油戰開火 - 割柑人

油組同盟友俄羅斯嘅石油減產談判破裂,油價一度急跌三成,中東股市慘遭血洗。資料圖片

股滙油市,腥風血雨!正當武漢肺炎全球蔓延,各國石油需求驟降之際,油組同盟友俄羅斯(OPEC+)嘅減產談判破裂,俄國拒絕減產,沙地不惜反手發動價格戰——減價兼增產,企圖倒逼俄國埋枱再傾。油價一度急跌三成,中東股市慘遭血洗。

俄國作為石油出口大國,點解唔肯減產抬價?關宿敵美國事!近年美國頁岩油冒起,頁岩油產業要有利可圖,需要油價升至一定水平,過往OPEC+減產抬價,美國得以坐享其成,俄國心中有氣,今趟寧願推冧油價,都要趁美國應付疫戰將佢打殘。

市場避險情緒高漲,資金湧入黃金、美債。美股、美債不停倒逼聯儲局減息,CME FedWatch利率期貨顯示,3月18日再減息0.75厘機會升至七成。外圍不靖,中港股市周一分別再跌3%同4%。恒指收25040,跌穿頭肩頂頸線,量度跌幅可跌至22800。

盟友關係頗為虛偽,睇油戰、疫戰就知。武漢肺炎爆發,中國盟友北韓同俄國率先封關,前者話邊界射殺,後者就大舉搜捕,為求自保反轉豬肚。不單國與國,民與民亦然,湖北以外中國人,既叫「湖北加油」,又叫「湖北車牌不讓進」!

中國工廠陸續復工復產,疫情未退,點解咁急?工廠1月中起放假過年,適值疫情爆發,部份停擺至今近兩個月,若3月仍未復工復產,勢難阻止外資離開,搵新嘅產業鏈供應源。中國科學院就警告,勞動密集型嘅紡織品、高科技電子產品,對外轉移風險較高。

復工復產事在必行,但喺疫情之下,勞動密集型產業容易成為傳播病毒溫床,中國若爆第二波,經濟堪虞。疫情對中國以至全球經濟嘅打擊,切勿掉以輕心,後市存在眾多變數,暫宜觀察,好過入市搏殺。

割柑人
本欄逢周二刊出

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2020 AD Internet Limited. All rights reserved. 版權所有 不得轉載