› 選擇地區
三藩市
紐約
洛杉磯
其他美國地區
香港 台灣 北美
 
2020年03月12日

【冰說聰明】美股ETF散水添沽壓 - 青冰

今次美股跌勢勁,跌勢極之全面,好難搵到有龍頭股逆市跑贏,這可能跟指數ETF有關。資料圖片

周一發生的股災,觸發事件是沙地打石油戰,但沙地貴為美國尊貴盟友,話事前無提水真係搵鬼信,再睇侵侵星期一晚發的tweet,主力講肺炎比普通感冒死亡數字低,都無怪責沙地的行動震散美股,字裏行間難免令人聯想,侵侵早已知道。

如果無肺炎疫情,沙地這一着是否夠力令美股熔斷,永遠都唔會知,較合理的解釋係,個市被病毒入侵,本已虛弱,任何風吹草動都足已釀成股災。今次美股跌勢勁,跌勢極之全面,好難搵到有龍頭股會逆市跑贏,這可能跟指數ETF有關。

指數ETF近年大旺,尤其是美股的ETF,當中SPY,即標普500指數的ETF,更是當中的巨無霸,先畀一些數字,等戰友有個概念,1月底時,SPY的總資產是3078億美元,如當佢係一間上市公司,已經是全美廿大,在熔斷股災日,成交有866億美元,而蘋果、亞馬遜及特斯拉三股加埋,都只有444億美元成交,由此可見其影響力。

指數基金有新錢流入,就會增發單位,令總資產增加,之後新錢又會買返落去成份股,好似雪球咁越滾越大,越多錢流入,標普成份股就更多資金追捧,相輔相成。不過近期這個雪球融雪,資金大量流出,亦加添了沉重沽壓。按彭博數據顯示,截至1月底時SPY的總發行量是9.56億股,至2月21日,即冧市前一星期,數字亦未有大變動,但睇返周一的數據,發行量已減至8.79億股,當中流走了7,700萬股,總資產少咗761億美元,即係等於美團(3690)的市值。

另一有趣發現,青冰翻查過去幾年的記錄,每當有股災,SPY的單日換手比率係會高企在30%以上,當數字回落至20%樓下並持續數天,就是見底訊號,且看這個指標,在當前亂世,是否還經得起考驗。

青冰
http://fb.com/chingbing888
本欄逢周四刊出

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2020 AD Internet Limited. All rights reserved. 版權所有 不得轉載