› 選擇地區
三藩市
紐約
洛杉磯
其他美國地區
香港 台灣 北美
 
2020年03月17日

【操盤手札記】放水反致恐懼鬥「質」 - 割柑人

美國聯儲局再突然減息,更重啟量化寬鬆,市場不喜反驚,美股期貨跌停。 資料圖片

兩三日都等唔切,美國聯儲局再喺議息前突然減息,更重啟量化寬鬆(QE),市場不喜反驚,美股期貨跌停。武漢肺炎疫情對經濟嘅傷害,比表面更大鑊,非急救不可?事實上,隨着疫情全球大流行,環球股市恐懼鬥「質」,已演變熊市大流行。

今趟係聯儲局喺兩周內第二度緊急減息,此前七個半月,已累計減息1.25厘,連同今趟減息1厘,聯邦基金利率降到0至0.25厘。睇嚟就快實現美國總統特朗普半年前嘅願望——負利率,當日佢鬧爆聯儲局,話唔減息至負利率就係笨蛋(bonehead)。

聯儲局再出重手,顯出高度關注上周喺股市、債市出現嘅流動性緊縮,因而試圖防範信貸市場出現衝擊,並向其他經濟環節擴散。放水雖可紓緩疫情衝擊,但即時對實體經濟幫助唔大,疫情令經濟活動收縮亦唔係放水可以解決,更遑論解決疫情。

市場擔心疫情未退,聯儲局已耗盡子彈,面對衰退,有咩彈藥救市。事實上,睇番中國,疫情雖漸受控,但經濟所受衝擊浮現。統計局公佈首兩月消費、工業、投資數據,三駕馬車都死火,大幅負增長,形勢差過2003年沙士,甚至係半世紀最差。

周一,中港股市分別大跌3.4%同4%。恒指一度低見22842,收23063,日線圖呈身懷六甲,處於上周五嘅波幅22500至24200之內。恒指上周五低位剛啱觸及由2008年低位10676延伸嘅長期上升軌支持位,隨即反彈,有短期見底迹象。

市況波動,抄底有風險,短炒博反彈,宜小注怡情,切勿借孖展;若睇長線,亦要控制注碼,分注吸納。疫市投資,可留意中國救市政策受惠股;此外,歷史上大流行疫情,往往會令健康環保意識提升,相關股份亦可留意。

割柑人
本欄逢周二刊出

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2020 AD Internet Limited. All rights reserved. 版權所有 不得轉載