› 選擇地區
三藩市
紐約
洛杉磯
其他美國地區
香港 台灣 北美
 
2020年03月24日

【操盤手札記】老散老手 抄底敗走 - 割柑人

現時恒指市盈率不足9倍,PB低於1,估值低殘,唔少投資者忍唔住撈貨。 資料圖片

武漢肺炎疫戰變成戰役;不過,以往打仗戰略係攻城,今趟係封城!全球近34萬人確診,近1.5萬人死亡;意大利最慘,死逾5,000人,究竟要死幾多人先有群體免疫?唔該約翰遜講吓!

疫情引發市場恐慌,各國救市手段越進取,越令市場擔心經濟衰退,造成越救越跌局面。美股繼道指兩周內四度熔斷後,本周一道指期貨再度熔斷,資金泊入美元作避風港。以道指上周五收19173計,已低過特朗普2017年就任美國總統時嘅19804。

早前,「股神」畢菲特話:「活了89年,首見咁嘅市況」;「商品大王」羅傑斯就話:「有生以嚟,最壞一次」。即係有幾壞?二戰以嚟,美股經歷12次熊市(唔計今次),平均跌幅33%,最壞嗰次係金融海嘯,跌幅57%。以此推算,道指要跌至12714!

睇番港股,周一「You jump, I jump」,插4.9%,收21696。若疫情惡化,香港經濟重返2008至2009年上次衰退時,以港股「金融海嘯底」市盈率(PE)7.1倍計,恒指跌至17000水平先見底;若以2011年「歐債危機底」7.7倍計,亦要跌至18700水平。

現時恒指市盈率不足9倍,市賬率(PB)不足1倍,PB低於1,即股價較每股資產淨值更低,估值低殘,唔少老散、老手忍唔住撈貨;不過,目前上市公司嘅核心問題唔係估值,而係盈利轉差。疫情未完,危機未了,而所有經濟危機,都同債務有關。

股壇常言道:「新手死於追高,老手死於抄底」,本來老手見慣風浪,相對新手審慎,但喺大升之後大幅回調,就覺得係機會,點知今趟熊市嚟得急兼上落大,老手都要失手,抄底變成淆底。

割柑人
本欄逢周二刊出

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2020 AD Internet Limited. All rights reserved. 版權所有 不得轉載