› 選擇地區
三藩市
紐約
洛杉磯
其他美國地區
香港 台灣 北美
 
2020年03月31日

【操盤手札記】禁聚玩殘股東會 - 割柑人

會德豐遲吓就私有化舉行EGM,在限聚令下,若只有零星小股東出席投票,隨時得米。資料圖片

港府再推抗疫措施,禁止4人以上聚集。點解係4人?特首林鄭坦言「冇乜科學基礎」,但佢月初先話抗疫「以科學同理論為本」!12項豁免中嘅「團體履行法定責任會議」,上市公司股東周年大會(AGM)入圍,股東特別大會(EGM)就冇咁好彩。

周一原有7間上市公司舉行EGM,但各有做法,阿里健康(241)、財訊傳媒(205)叫停,瑞港建設(6816)、世紀娛樂(959)照開,世娛更上演報警鬧劇。遲吓會德豐(020)、利豐(494)就私有化舉行EGM,若零星小股東出席投票,隨時得米。

疫情嚴峻,各國經濟停擺,中國率先復工復產,但中央叫復工,好多工廠卻未復工,皆因擔心引發群聚感染,若有員工確診,老闆就要為全部員工做病毒核酸檢測,所費不菲。另外,現時大量外貿定單被取消,復工接單都驚會cut單,收唔到錢。

另一邊廂,美國本來想喺4月12日復活節前復工復產,但疫情惡化,總統特朗普延長社交距離抗疫措施至4月30日,復工延至6月1日。現時全美逾14萬人確診,復工係要錢定要命嘅抉擇!美股上周大上大落,疫情之下,投資者拋售股票等風險資產。

周一港股期指結算日,恒指收23175,跌1.3%。恒指守住上周三22753至23062嘅裂口,並繼續企穩10天線之上,10天線更由跌轉升,發出向好訊號。10天線係短線好淡關鍵,若守得住,調整後仍有力再戰24000關;若守唔住,或要下試22000關。

內地復工復產事在必行,各省市可望提前全面解封,隨着通城通關在即,有利公路流量。公路股越秀交通(1052)現價4.67元,市盈率6.2倍,股息率8.4厘,估值吸引,不妨逢低收集。

割柑人
本欄逢周二刊出

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2020 AD Internet Limited. All rights reserved. 版權所有 不得轉載