› 選擇地區
三藩市
紐約
洛杉磯
其他美國地區
香港 台灣 北美
 
2020年04月02日

【冰說聰明】揀高息股加倍小心 - 青冰

受英倫銀行之感召,滙控、渣打等大bank,都要跟隨取消派息。資料圖片

滙控(005)在今年的愚人節,向股東開咗一個最大的玩笑,宣佈今年底前都不會派發季息,最大鑊嘅係連二月已經除淨的0.21美元股息,佢都話取消,董事會只係淡然講咗一句「表示遺憾」,本來每年都會在香港舉行的非正式股東會,因為疫情嚴重,今年唔搞喇,所以各位長期股東,想搵個機會兜口兜面鬧吓都冇。

老一輩的長期股東固然傷心,但現時手持逾7%的平保(2318),亦被跣了一鑊,青冰記得當日平保首次舉牌時,財務官話買滙控,係一項很好的財務投資,無意入董事局,自2017年後多次增持,而上月環球大跌市,北水都有幾天狂買滙控,更試過單日買十億元,至於係唔係平保出手,相信要等佢再申報先知。這兩年幾,滙控股價長期落後,除咗每年穩定地派4蚊息,實在冇可取之處,以現價計,平保應該仲坐緊艇,所以市場不其然認為,入股增持係政治任務,增加在國際銀行業的話語權。

今次取消派息,其實係受英倫銀行之感召,所以包括渣打(2888)在內的大bank,都要跟隨,而歐洲央行亦有同樣的決定,疫情正值非常時期,既然都可以亂放水救市,直接出手干預都係好平常箒,一陣你照派息但冇錢營運,最後也是要央行出手救,至於多年來銀行建立的信譽,就唔理得咁多喇。不過現在更顯得堅持派息的企業可貴,學戰友話齋,一來一回六分波呀。噚天同系的恒生銀行(011)跟阿媽一齊跌,青冰反而覺得市場過慮,阿媽唔掂,阿仔更加要擔起頭家,增加家用就難啲,始終自己都要保命,但維持泵水畀阿媽,相信是當前急務囉。

最後都要提醒多次,股息率係去年的息,現在的價,武肺大風暴已令股價變6折7折,息率一定係比之前吸引,但當滙控都呃你嘅時候,揀高息股要加倍小心啊。

青冰
http://fb.com/chingbing888
本欄逢周四刊出

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2020 AD Internet Limited. All rights reserved. 版權所有 不得轉載