› 選擇地區
三藩市
紐約
洛杉磯
其他美國地區
香港 台灣 北美
 
2020年04月07日

【操盤手札記】堵疫兼要堵蕭條 - 割柑人

有「鱷王」之稱嘅橋水創辦人Ray Dalio估計,全球企業將因疫情損失12萬億美元,接近中國或歐元區嘅經濟總量。資料圖片

「未來14日係防疫關鍵」呢句話,過年聽到𠵱家,仲要幾多個14日?參考上世紀三次全球大流行——西班牙流感、亞洲流感、香港流感,都喺4月開始轉弱,若歷史重演,估計捱多一兩個月,環球經濟有望恢復。不過,大流行唔止爆一輪,小心!

以武漢肺炎過去5日全球新增確診分別達7.51萬、8.06萬、8.28萬、10.15萬、7.47萬宗嚟睇,期望疫情4月見頂回落,亦似乎言之尚早。環球經濟受創,衰退已成共識。各國封城堵截疫情,減息印鈔堵截衰退,惟只能為企業吊命,未能挽救經濟。

早前,有「鱷王」之稱嘅橋水創辦人Ray Dalio估計,全球企業將因疫情損失12萬億美元,接近中國或歐元區嘅經濟總量。企業損失只係頭盤,破產同債務違約先係主菜。有「華爾街預言家」之稱嘅歐洲太平洋資本總裁Peter Schiff就警告,若通脹升到4%,債務就會爆煲。

疫情之下,停工減產,供應下跌,各國放水,固然引發通脹;但執笠破產,減薪裁員,需求下跌,則會引發通縮。消費力同投資力大減,想唔衰退都難,更甚嘅係引致蕭條,現時前者機會較大。

美國總統特朗普一句「疫情出現好兆頭」,加上據報俄羅斯同沙地接近傾掂減產,美股期貨急升,帶動港股飆2.2%,收23749點。恒指守穩10天線,有力再戰24000關。疫情之下,home economy取代social economy,相關股份受捧。

宅經濟股中,除咗有網上消費、手機支付等業務嘅企業如騰訊(700)、阿里巴巴(9988),仲有提供上網服務嘅企業如香港電訊(6823)。5G開鑼,香港電訊食正條水,加上現價股息率有6厘,不妨留意。

割柑人
本欄逢周二刊出

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2020 AD Internet Limited. All rights reserved. 版權所有 不得轉載