› 選擇地區
三藩市
紐約
洛杉磯
其他美國地區
香港 台灣 北美
 
2020年04月23日

【冰說聰明】期油之死亡漩渦 - 青冰

5月期油歷史性以負37.45美元收市,接着油股ETF會將6月期油轉至9月份,進一步踩低6月期油,形成一個死亡旋渦。資料圖片

若說三月是股災月,那四月肯定是油災月了,當大家以為上月油價跌一半好大鑊,但周一晚上5月期油歷史性以負37.45美元收市,顛覆了我們在書本上學習的理論,還記得讀書時代,教授話在期貨市場,沽家是贏有限輸無限,因為價格可以不斷升,相反買家輸極都係你付出的價格,因為最低係零嘛。

散戶狂撈油股ETF,期油轉倉成本導致損失,這幾天已經有唔少欄友解釋過,但相信大家都想不到,轉倉及交收的因素,促使期油價見負數。不過原來上月19日瑞穗證券Paul Sankey已警告,國際油價會一直跌至負數,因為武肺令全球對石油需求劇減,油企要搵地方儲油,油庫最終會飽和,令庫存成本急升,屆時油企寧貼錢畀大家買油,造成負油價。想當日期油一度高見27美元,相信當時大部份市場人士,都會覺得佢飲大咗,語無倫次,結果就是「我笑他人看不穿」。

相信這個幾月,因油價急瀉而入場博反彈的,有99%人應該沒想過油儲的問題,當期油係期指咁炒。全球最大的儲油庫係在俄州的庫欣(Cushing),根據資料,佢哋上限容量係7,600萬桶,截止4月10日的數據,已經有5,496萬桶,逢周三便會更新資料,本文見報之日就知最新數字,可能屆時已經爆倉了。5月期油要實貨交收,一張合約一千桶啊,冇地方擺又要交收,自然係平倉離場啦,但市場上哪有大量買盤承接呢,所以一切就如Paul Sankey所言,負油價。

最新發展係油股ETF會將6月期油轉至9月份,而美國那隻USO亦轉至8月份,結果係點?就係一齊再沽6月去轉倉,進一步踩低6月期油,形成一個死亡漩渦。你話一個尋常散戶,如何懂去理解以上事件?先求知再投資可能是事後孔明,但急插勿接飛刀,實在是散戶保命大智慧。

青冰
http://fb.com/chingbing888
本欄逢周四刊出

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2020 AD Internet Limited. All rights reserved. 版權所有 不得轉載