› 選擇地區
三藩市
紐約
洛杉磯
其他美國地區
香港 台灣 北美
 
2020年05月19日

【操盤手札記】黑心商人殺後代 - 割柑人

近日大陸有幼兒因食用冒充特醫奶粉嘅「倍氨敏」而患佝僂病,似大頭娃娃。黑心商人,攞下一代嘅命! 互聯網圖片

1966年5月16日,中國文化大革命拉開序幕;54年後,今年5月15日,香港教育局批鬥考評局,文革影子隱現。此前4日,特首先話教育唔可以係「無掩雞籠」,擺明籌謀洗腦教育,扼殺下一代獨立思考能力。不過,講到為害下一代,唔少得佢哋……。

佢哋就係大陸嘅黑心商人!繼2003年安徽阜陽嬰兒因食用劣質奶粉導致營養不良,出現「大頭娃娃」後,2005年湖南株洲再有嬰兒因食用劣質奶粉而成大頭娃娃。近日湖南郴州則有幼兒因食用冒充特醫奶粉嘅「倍氨敏」而患佝僂病,似大頭娃娃。

劣奶粉、假奶粉之外,更有毒奶粉。2008年,眾多嬰幼兒因食用三鹿奶粉而患腎結石,揭發奶粉含化工原料三聚氰胺。賣劣、假、毒奶粉,係攞下一代嘅命!食品安全,民生之本,「倍氨敏」事件勢將觸發乳業監管升級,但對大型乳業公司有利。

上周大型乳業股就炒咗轉,當中,蒙牛(2319)除咗炒汰弱留強,仲有消息跟尾,其一係可口可樂同蒙牛設合營企業,喺中國產銷低溫奶製品;其二係恒指公司季檢,國指納入蒙牛。

本周市場焦點,主要係中美關係、全國兩會。上周五發生2件事:一、美國收緊向華為供應晶片;二、華為晶片供應商台積電赴美設廠。美國截斷華為供應鏈,中美貿易戰第二波──科技戰敲響戰鼓。至於兩會,市場憧憬將有刺激經濟政策出台。

上月政治局已提出保就業、保民生等「六保」,基建股尤其新基建如5G、晶片等料受扶持;另外,新經濟股、內需消費股料亦受惠。港股周一升0.6%,收23934。恒指呈現頭肩頂,以上次市況橫行一周先下破嚟睇,今次或等兩會消息後先轉弱。

割柑人
本欄逢周二刊出

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2020 AD Internet Limited. All rights reserved. 版權所有 不得轉載