› 選擇地區
三藩市
紐約
洛杉磯
其他美國地區
香港 台灣 北美
 
2020年05月26日

【操盤手札記】國安法各國互摸底 - 割柑人

香港係國際金融中心,國際利益攸關,「港版國安法」草案曝光,各國正與中國互相摸底。 資料圖片

兩會主旨,不外乎一個「穩」字——穩中國經濟、穩香港局勢。上周四晚,「港版國安法」草案曝光,將於本周四表決,最快8月在港執行。事件引發國際譁然,更上升至中美角力層面。政治行為,在乎利益,中國打香港牌,似為叫個好價。

中共行事講快狠準,仲等表決、等執行?睇呢幾日美、英、加、澳、歐盟表態關注,顯然各國正與中國互相摸底,香港畢竟係國際金融中心,國際利益攸關。中美角力正由貿易戰擴至科技戰、金融戰,中國將香港推上國際舞台,必有所圖。

港版國安法料成定數,變數則係具體條文,點樣落實、執行?無論如何,一國兩制瀕亡,市場擔心美國撤銷香港特殊經貿待遇,資金有流走迹象。港股上周五急瀉5.6%,本周一喘穩,微升0.1%,收22952;港滙低見7.7575,遠期港滙更低見7.8358。

恒指上周五已跌破個半月嚟嘅橫行區底部,並失守10天、20天、50天線,技術走勢轉弱,或會再度考驗3月19日低位21139,亦即今年低位,甚至破底。不過,經過上周五大跌,短線唔排除會有技術性反彈,但唔足以扭轉弱勢。

港股經歷多次政治市,最經典係80年代初,中英就香港前途談判陷入僵局,恒指由1981年7月嘅1810點,跌至1982年12月嘅676點,累跌63%;1983年7月回升至1,102點,10月又跌至690點,累跌37%,見雙底後先至回升。睇嚟今趟或要見雙底。

喺疫情、社運、政治同外交角力下,投資要更審慎。不過,仍可留意創新科技股,如5G、AI、雲服務,以至內需消費股,吼位分注作中長線吸納,尤其行業龍頭。此外,港交所(388)有機會「接收」大批中概股,亦可逢低收集。

割柑人
本欄逢周二刊出

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2020 AD Internet Limited. All rights reserved. 版權所有 不得轉載