› 選擇地區
三藩市
紐約
洛杉磯
其他美國地區
香港 台灣 北美
 
2020年05月28日

【冰說聰明】美股聖手的盤算 - 青冰

九倉主席吳天海。資料圖片

九倉(004)早兩日公佈沽售的美股投資,分別是亞馬遜及facebook,套現近73.8億港元,兩股分別為九倉獲利15億及3億,尤以投資亞馬遜最為成功,套現34億但賺15億,回報近八成,簡直係美股聖手。

3年前,九倉因分拆九倉置業(1997)及賣咗九倉電訊,錄得巨額盈利,手頭上多了幾百億現金,當市場憧憬會派特別息時,失驚無神話已投資環球新經濟股及本地地產股,覺得前者仍大有可為,包括一些大家熟悉的網上平台。而買地產股,係因為買地難,所以投資本地地產股,變相買地云云。

現時回看,網上平台即係亞馬遜囉,此話在公佈2017年度業績講嘅,2017年底亞馬遜股價約1169美元,差不多是以全年最高位收市,但現時回看,那日的所謂高位,今日仲升多一倍。

單睇這兩個美股交易,簡單係神級啦,不過幾百億的股票投資,多年來都係以港股為主,按年報顯示,2017至2019年的股票投資有191億、291億及341億,當中港股投資佔總投資6至7成,咁究竟港股係買新經濟股還是地產股多,年報沒披露。青冰記憶中主席吳天海在業績會也從沒漏口風,戰友只能靠估了,但以幾隻龍頭地產股計,2017年入市,至今普遍要輸3成以上,所以照咁睇,美股聖手,拉勻個倉應該都係輸錢,股東們不禁會問,點解當日唔派息畀我哋呢?

九倉今年急跌三成,市值得返410億,賣美股套現後,仲有200幾億港股,提醒市場佢含金量很高,但又提返你,會德豐(020)私有化的作價,是1股九倉、1股九倉置業及12元現金,投票在下月16日進行,九倉沽美股歷時十個月,又咁啱在上星期沽清發通告,係咪想提醒市場九倉好值錢,𠱁會德豐股東投贊成呢?

青冰
http://fb.com/chingbing888
本欄逢周四刊出

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2020 AD Internet Limited. All rights reserved. 版權所有 不得轉載