› 選擇地區
三藩市
紐約
洛杉磯
其他美國地區
香港 台灣 北美
 
2020年06月02日

【操盤手札記】美國辣招唔算辣? - 割柑人

特朗普話要加強審視美國上市嘅中國公司,中概股面對嘅風險增加。 資料圖片

中美就「港版國安法」開拖,美國宣佈多項制裁措施,包括取消香港特殊待遇,但冇使出市場最擔心嘅辣招:一、取消中美貿易協議;二、切斷中資銀行對國際銀行嘅金融連接。由於制裁偏向政治層面,而且未有執行詳情同日期,被指冇料到。

周一港股趁機挾淡屠熊,大升3.4%,收23732。不過,中美對峙,已經劍拔弩張,勢將繼續過招。睇特朗普嘅「檄文」,力數中共喺政治、經濟、科技、防疫、外交上嘅不是,美國對中國,似乎不囿於打貿易戰、科技戰、金融戰,甚至直指軍事。

中美磨擦升級,會否擦槍走火,要睇三個風向儀,一、人民幣,二、稀土股,三、軍工股。以現時A股軍工指數(深:399959)嚟睇,中美角力未到軍事層面,仍停留喺金融層面、貿易層面,前者可睇人民幣走勢,後者可睇稀土股走勢。

港股上月跌6.8%,本月開局呈報復式反彈,雖然周一裂口升穿10天線同50天線,距離20天線亦只差些少,走勢大為改善,但未升穿由2月17日高位28055延伸嘅下降軌阻力24100水平,難言扭轉跌勢。

特朗普嘅「檄文」提到加強審視美國上市嘅中國公司,加上《路透》爆料共和黨將提呈阻止投資中國軍方關連企業嘅議案,中概股面對嘅風險增加。據華興證券統計,目前有36隻中概股符合港交所(388)2018年上市新規,可能來港第二上市。

中概股回流,或者話逃亡,已成趨勢。當中,網易上周五正式上載招股書,周二至周五公開招股,下周四掛牌;京東則傳6月8日公開招股,6月18日掛牌。網易、京東分別係內地網遊、電商老二,不妨抽新股玩吓,但要食快餐,坐耐啲有風險。

割柑人
本欄逢周二刊出

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2020 AD Internet Limited. All rights reserved. 版權所有 不得轉載