› 選擇地區
三藩市
紐約
洛杉磯
其他美國地區
香港 台灣 北美
 
2020年06月04日

【冰說聰明】油價回鄉 3175仍然傷 - 青冰

4月中,5月期油歷史性見負數收市,唔少ETF都玩搬龍門。資料圖片

油價昨天已升近至38美元,是油價戰大裂口後最高水平,雖然仍未回補整個裂口,但總算係一個里程碑,我哋咁關心油價,並唔係因為怕油王冇錢揼水去搞足球,而係港股出了一隻死傷慘重的石油ETF,3175。

在石油價格戰前,極少人留意3175,成交額只係幾百萬元,但油價急瀉,發行商努力賣廣告,配合散戶天生愛撈底的性格,成交變成每日幾億元,整個故事的高潮,在美國時間4月20日,5月期油歷史性見負數收市,負37.63美元,在翌日港股收市後,發行商就決定更改對沖模式,由掛鈎即月期油(當時係6月),改成9月,咁隻ETF開市梗係暴插啦,由3.32元跌至1.79元,單日唔見46%。搬龍門固然衰格,發行商在5月3日索性再衰多次,由掛鈎9月改成9月、10月及12月,每月佔三分之一,諷刺的是,油價自那天起便踏上反彈之路,當時即月期油係19.78美元,3175係1.77元。

現時期油價係約38美元,差不多反彈近倍,3175就累升48%,畀着以前,唔跟足肯定被鬧爆,但經過各大專家分析,大家都認識更多,轉咗去掛遠期月份嘛,9月期油由5月初至今,累升57%,這個幅度跟3175比,就合理得多了。戰友馬後炮自然會講,唔轉倉就返家鄉啦,被發行商搶錢呀,但咁講有少許不公,當日大家只怕6月期油再見負數,3175可能total loss,發行商只是好心做柒事。

咁應該要怪邊個呢?原來芝加哥商品交易所在4月15日發公告,話如果出現負油價,交易係會如常進行的,當日沒太多人留意(包括青冰),但或許就是一切事件的起源,除了3175,在美國上市的原油ETF也有類似的搬龍門,當全世界都一齊打靶,期油大戶自然識玩,眾地莫企,大家也上了寶貴一課。

青冰
http://fb.com/chingbing888
本欄逢周四刊出

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2020 AD Internet Limited. All rights reserved. 版權所有 不得轉載