› 選擇地區
三藩市
紐約
洛杉磯
其他美國地區
香港 台灣 北美
 
2020年06月09日

【操盤手札記】總理竟然也踩雷 - 割柑人

「地攤經濟」一詞喺6月4日被中宣部封殺,據講關面子、權鬥事。 資料圖片

上周五,美股借就業數據大幅挾升,懶理疫情、示威,Wall Street唔理Main Street死活,又一例證;總統特朗普更開記招做show。翌日,香港特首林鄭忽然特朗普上身,趁港股上周累升1,808點,喺fb攞威,話已收復「港版國安法」公佈後嘅失地。

美國失業率無預期咁差,中國失業率則霧裏看花。國家統計局5月15日公布,4月失業率為6%;不過,數據並無包括農民工。華盛頓智庫估計中國失業率為15%;法國興業銀行則估計為17%;中泰證券4月26日曾出報告估計為20.5%,但報告被撤回。

中國目前最政治敏感嘅數據唔係GDP,而係失業率。總理李克強5月28日喺人大閉幕記者會上,提到「有6億人每月收入也就1,000元」,又提到「地攤經濟」有助解決失業。不過,「地攤經濟」一詞,喺6月4日被中宣部封殺,據講關面子、權鬥事。

地攤有失體面?好多富豪都不諱言擺檔起家,包括華為創辦人任正非擺賣減肥藥、火警器;阿里巴巴(9988)創辦人馬雲擺賣鮮花、衣服;海底撈(6862)創辦人張勇擺賣麻辣燙;正在招股嘅京東(9618),創辦人劉強東亦曾擺賣光碟、光碟機。

姑勿論「地攤經濟」係咪散檔,但已勾劃出中國失業問題嚴峻。周一,中港股市高開低走,分別微升0.24%同0.03%。恒指一度直搗保力加通道頂部25000水平,收24776,短線或回吐至中軸24000水平,只要維持喺50天線之上,有力再戰25000關。

地攤降溫,網上攤檔卻升溫。阿里巴巴將於本月18日舉行疫後全國最大網購節日「天貓618」;另外,富時中國50指數將於本月19日納入阿里巴巴,收市後生效,兩者都有望刺激股價,不妨留意。

割柑人
本欄逢周二刊出

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2020 AD Internet Limited. All rights reserved. 版權所有 不得轉載