› 選擇地區
三藩市
紐約
洛杉磯
其他美國地區
香港 台灣 北美
 
2020年06月30日

【操盤手札記】國安之下的不安 - 割柑人

港股向來要睇中美面色,疫情同政治不明朗下,科網股可睇高一線,尤其在港單一上市龍頭。 資料圖片

2020年過咗半年,天災人禍不斷。全球疫情未退,美國連續3日新增確診突破4萬,12州煞停解封。中國疫情相對緩和,但疫情以外,南方水災、北方旱災,東北更受蝗蟲、冰雹、火山困擾。屈原話齋:「皇天之不純命兮,何百姓之震愆」。

疫情全球肆虐,確診已過千萬。國際貨幣基金組織(IMF)警告,金融市場同實體經濟走勢脫節,若疫情惡化令各地重新封閉,可能導致風險資產如股票等暴跌。香港連續16日無本地感染,短期最影響港股嘅唔係疫情,而係港版國安法!

港版國安法表決前,上周四美國參議院通過《香港自治法案》,以制裁損害香港自治嘅人士同企業;上周五國務卿蓬佩奧就話,將向損害香港自治嘅中共官員實施簽證限制。中國則放風,可能減少買美國貨反制。中美博弈,香港再成棋子。

國安之下,市場不安,資金用腳投票。財政司陳茂波喺網誌話,無顯著嘅資金外流,論據係4月以嚟,港滙多次觸及強方兌換保證,金管局接盤,合共釋出570億元。不過,富瑞資金流報告顯示,中港股票基金連續10周走資,合共流走1,731.4億元。

港股向來要睇中美面色,美國疫情向上走,股市向下走,加上聯儲局連續兩周縮表,上周五道指急跌2.8%;周一中國股市端午假後復市,滬指跌0.6%,港股亦跟跌。喺期指結算日,恒指跌1%,收24301,後市料喺24100至25300爭持。

喺疫情同政治不明朗下,科網股可睇高一線,尤其在港單一上市嘅龍頭,皆因兩地上市嘅公司受兩地氣氛影響,表現難免稍遜。睇ATM中,騰訊(700)、美團(3690)近排屢屢破頂就知,阿里巴巴(9988)相對遜色。

割柑人
本欄逢周二刊出

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2020 AD Internet Limited. All rights reserved. 版權所有 不得轉載