› 選擇地區
三藩市
紐約
洛杉磯
其他美國地區
香港 台灣 北美
 
2020年07月02日

【冰說聰明】新股十八羅漢陣 - 青冰

以往新股都怕撞期,分薄資金,影響招股反應,今次完全唔避忌,係對無限QE有信心,還是怕蘇州過後無艇搭,可自行解讀。資料圖片

如果冇數錯,現時仲未截止認購的新股,共有18間公司,涉及的行業應有盡有,熱爆的生化股、獨特的電子煙、久違的手遊、內房及物管等等,在青冰記憶中,18隻同期招股應是近十年最熱鬧的,以往新股都怕撞期,分薄資金,影響招股反應,今次完全唔避忌,係對無限QE有信心,還是怕蘇州過後無艇搭,可自行解讀。

雖然花多眼亂,但要從中找出最值博的,也不是想像中咁難,若戰友相信市場力量,睇吓邊隻孖展額夠爆的,跟住落注相信贏面較大,歐康維視(1477)孭住最煞食的B字,首日招股已經超購三百倍,另一隻B仔永泰生物(6978)、電子煙思摩爾(6969)及物管正榮服務(6958),孖展額都有幾十億,不乏捧場客。

留意返贏面較大並不等同食硬,以歐康維視為例,超購700倍應該不難,以本周上市的康基醫療(9997)為例,41萬人參與,超購900倍,要申請90手先穩獲一手,如果資金唔多,做完孖展都可能中空寶,蝕息又蝕手續費,當然戰友敢落注在A尾B頭,都分到4手,現時股價倍升,扣除使費後也獲利甚豐。不過就是康基醫療珠玉在前,炒鬼自然更瘋狂玩更大,中簽率更低,到時上市只升五成都可能暴動。

由於資金集中在歐康維視、永泰、思摩爾及正榮服務身上,其餘的雖然乏人問津,但未必冇錢途,唔用孖展,現金出擊也有個好策略,揀啲入場費較高的,適量下注,因為冇人抽嘛,隨時中到兩、三手,只要屆時大市氣氛仍好,爆升未輪到佢,但升一、兩成已經好好味,別忘了有不少證券行,現金抽是免手續費的,成本低廉有回報,性價比高啊。

每個新股狂潮,要有大熱倒灶才會散band,意即要孖展客損手,究竟會否在這十八羅漢中出現,拭目以待吧。

青冰
http://fb.com/chingbing888
本欄逢周四刊出

精挑細味 籽想好食,即like「籽想好食」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2020 AD Internet Limited. All rights reserved. 版權所有 不得轉載