隔牆有耳:
呂壽琨畫作復修後展出 - 李八方

更新時間 (HKT): 2015.01.30 05:20
中大獲贈已故水墨畫家呂壽琨的作品,將會進行復修。許頌明攝

已故著名本港水墨畫家呂壽琨三十幅「滄海遺珠」真迹復修後將首度公開展覽,水墨畫迷有機會欣賞大師傑作。中文大學文物館去年底獲呂壽琨家人捐贈廿九幅珍貴水墨畫作品,最近更獲得美銀美林資助,請到來自蘇州嘅「蘇裱」技藝傳人謝光寒親到香港復修呢批畫作,預計花一年多時間就可以完成復修,有望明年展出。

負責項目嘅中大文物館副館長姚進莊話,今次復修嘅作品包括唔少呂壽琨典型畫作,如將禪學融入畫作嘅「禪荷」、「急流逆舟」同「荃灣遊記」等,全部都係呂喺上世紀六、七十年代嘅作品,大部份從未公開展出過,唔少更係佢在中大教水墨畫時嘅作品。

「蘇裱」傳人謝師傅初步檢查過啲畫,未發現好嚴重嘅發霉或褪色問題,不過復修工作一啲都唔容易,唔單止要有技術,更加要熟悉畫家嘅歷史。謝師傅話,呢批畫有啲畫框尺寸太細,例如「禪荷」呢幅作品,畫框至少要九十厘米闊同一點七五米高先可以展示到畫家「以有限展示無限」嘅宗旨,而且本來裱畫嘅紙質唔夠靚,令畫作有起皺嘅問題,長此下去隨時令畫芯斷裂,所以今次復修主要係將畫作重新裝裱,但謝師傅就強調唔會補筆,以示尊重原作。

一格照片,一個故事,Follow蘋果Instagram!
BannerBanner