【李八方online】曾鈺成大爆CY避記者「妙計」 竟然係…

更新時間 (HKT): 2016.08.01 16:03
曾鈺成同傳媒飯敍,大爆CY避記者有妙計。(陳雪玲攝)

雙曾疑似入閘選特首,會唔會嚇到特首梁振英走夾唔抖?好多人可能好想,但暫時唔覺有咁嘅跡象。至於人氣極高嘅曾鈺成呢,同傳媒飯聚時大爆CY有避免記者追訪嘅「妙計」,大讚對呢招好「高」,仲自爆上屆特首戰,民建聯唐、梁都有撐,而佢係獲委派去撐唐唐㗎喎!

畢竟都喺左派圈子打滾咁多年,曾鈺成點會唔知CY係乜嘢人?佢大爆回歸前上京開籌委會一件趣聞,話當年比較晏開會,午飯過後成日同鍾士元、劉兆佳同梁振英四個人去散步,乜都傾,期間有談及傳媒追訪嘅問題,大爆CY發表過「魚缸論」。

即係乜?CY話自己有養魚,大魚會追住細魚咬,佢諗到條橋,喺魚缸中心放塊玻璃,隔開大魚同細魚,咁大魚一追嘞,就撞埋去玻璃,如是者,之後就算拎開塊玻璃,大魚都唔再追細魚。點樣實踐?

曾鈺成話當年有記者畀卡片CY,CY當面扔入垃圾桶,因為話無事需要搵對方,咁之後記者就唔會追訪佢啦!嘩,咁絕嘅橋都諗到,難怪曾鈺成話呢招好高啦!

曾鈺成繼而提及,CY去到2011年已經變咗好多,話做記者嘅人都睇到。咁信唔信CY真心改變?曾鈺成只笑而不語,仲話識對方咁耐,2011年先有幸獲邀到佢屋企食飯,仲話當年唐唐同CY去民建聯拉票,前者一次一次減分、後者一次一次加分,民記當時好小心,兩邊都有幫,而佢派咗去幫唐唐。

講起雙曾配,曾鈺成唔認係「配」,只話支持官員做事!咁曾俊華有無搵過佢幫手?佢話,有都唔講啦!咁曾俊華有咩弱點?佢認為係要爭取中央部分人同傳統左派信任,要解決呢個問題,就要搵個中央信得過而獲左派支持嘅人幫手。

問佢特首同行會召集人,如果揀一樣,佢揀乜?佢話揀行會,笑言因為一星期只返半日工。佢話真朋友、真兄弟,包括細佬同阿妹都唔想佢選,又強調選唔選都唔係幫細佬報仇。

一格照片,一個故事,Follow蘋果Instagram!
BannerBanner