【李八方online】韋志成寫網誌sell同行 返熱廚房有冇機?

更新時間 (HKT): 2017.04.02 19:26

政圈盛傳可能係下屆發展局局長熱門人選嘅發展局前常任秘書長、現任市建局行政總監韋志成,近日多次被問到係咪會重返政府工作,佢都冇正面回應。不過,今日佢就喺市建局個blog「摯誠‧志成」談及市建局將凍結人口調查嘅工作電子化,文章尾段無啦啦提到,科技促進咗效率,讓工作精力可以投放喺建立關係上,「切實體現『夥伴』、 『同行』的精神」。

點解咁熟口熟面嘅?「同行」係候任特首林鄭月娥競選時嘅口號,究竟係咁啱得咁橋?定係有心寫出嚟以示忠誠?不過韋志成舊年6月先上任市建局行政總監,任期仲有超過2年,會唔會重返熱廚房真係拭目以待啦。

佢嘅網誌提到,市建局每次喺公佈啟動重建項目時,都會派員到項目範圍逐家逐戶做凍結人口調查,以往都係用手寫表格,處理一個個案平均就要成個鐘,為咗提升登記流程效率,市建局喺上個月新開展嘅啟明街/榮光街項目,就首次將凍結人口調查電子化,改用電子表格為住戶登記,令登記時間節省咗一半,過往3日嘅凍結人口調查期間,一般只能處理到項目內約七成住戶,改用電子表格後,3日就可以接觸到近9成住戶,大大提高咗效率。

一格照片,一個故事,Follow蘋果Instagram!
BannerBanner