【八方相當年】自爆有童年陰影 何俊賢見到乜就怕怕?

更新時間 (HKT): 2017.06.05 12:31

民建聯何俊賢最近被黨委以重任,就係代替因為打龍通風波而辭任委員嘅周浩鼎,加入立法會調查UGL專責委員會。外界都好關注,呢位2012年代替黃容根出任立法會漁農界議員嘅高佬,喺委員會入面又會唔會有高質素表現?原來呢位身高1米93、有成6呎3吋半高嘅議員,細個唔算特別高,到中學時書友仔搵佢一齊打籃球,中一升中二嗰年先突然飆高。

今年37歲嘅高佬賢憶述兒時喺屯門區嘅成長歷時時,自爆有樣食物,見到就怕怕,就係「提子乾」嘞!話說佢外公係屯門青山灣漁民,媽媽則選擇離開水上,轉為做回收業、亦喺碼頭起卸區做拆貨工作,好記得當時媽媽收工之後,不時拎啲提子乾畀佢同姐姐食,食到佢哋怕怕,終於有日的起心肝向媽媽說「不」,估唔到媽媽好順應「民意」,話收到佢哋意見,「點知第二日,佢拎咗盒混合口味嘅提子乾返嚟...」

呢段童年回憶令佢同家姐至今都都好抗拒提子乾,笑言就連食泰式炒飯,都要挑返啲提子乾出嚟,果然係好大嘅童年陰影。佢亦話細個時屋企冇乜錢,最開心係同家姐、細佬、表哥一班人柴娃娃去泳灘游水,不亦樂乎玩餐飽。

高佬賢晉身立法會議員,原來都同媽媽有好大關係。佢話喎,當年唔少漁民都會搵媽媽幫手睇吓信件,問吓漁護署資料或者對外溝通等工作,一傳十、十傳八,久而久之搞到好似辦事處咁。佢中學就讀於南屯門官立中學,於英國伯明翰大學讀畢通訊及電腦系統工程後返港,亦有幫吓媽媽手,解答下業界問題,之後入埋業界組織,所以先會做到業界代表呀。

一格照片,一個故事,Follow蘋果Instagram!
BannerBanner