【李八方online】關愛基金埋單計數 課金最多係邊位富豪?

更新時間 (HKT): 2017.06.14 08:00
當年主理關愛基金嘅唐唐對此好着緊。

唔知大家仲記唔記得「關愛基金」呢壇扶貧基金?喺2010年社會一遍仇富聲音中,由前特首曾蔭權宣布成立,煲呔當年話政府與商界各出資50億元,合共100億,協助綜援計劃幫唔到嘅項目,而基金由前政務司司長唐英年打骰,外界一致認定係唐唐嘅「競選基金」,等班大孖沙透過捐款向當時嘅特首大熱示忠,商界確實一呼百應,但埋單計數,課金最多嘅竟然係你同我,典解呢?

當年大孖沙嘅捐錢熱情度,真係估佢唔到。挺唐大將李嘉誠認捐5億,四叔又話捐4億、郭氏兄弟又捐4億,誇張到短短兩日,成班有錢佬應承捐出35億,但實質係冇咁多。政府近日向立法會交代關愛基金嘅籌款情況可見,2011年只係籌到3億,之後一年、即係特首選舉嗰年最勁,有近5億元,但梁振英上場後,捐款情況每況愈下,去到2015/16年度,捐款只有100萬,2016/17年更只有7萬,今個財政年度開始咗兩個月,只有2.7萬。名副其實,虎頭蛇尾。

可能基金嘅「唐味」濃,令到梁粉唔多眼順,又或者預示到班大孖沙,唔會有向梁班子捐錢嘅意欲?林鄭喺2012年底時任政務司司長時,就公開話政府暫時唔會主動呼籲商界再捐款喎。

結果總計7年多來,關愛基金一共籌到18億,呢個數字同當初班富豪承諾嘅35億元,少咗一半噃。埋單計數,邊個富豪捐得最多?誠哥定四叔?統統都唔係,善長人翁其實係一眾納稅人。翻查資料,基金前後一共向立法會申請200億元注資額,最關愛香港人嘅就係香港人自己嘞。

一格照片,一個故事,Follow蘋果Instagram!
BannerBanner