【八方相當年】李國麟曾經係長毛 仲識破解摩斯密碼

更新時間 (HKT): 2017.10.30 15:22

每逢澳門政府派錢時,唔少香港人都恨到流口水,但澳門出世嘅衛生服務界議員李國麟(Joseph),原來從無貪過呢啲小便宜。澳門鏡湖醫院呱呱墮地嘅Joseph有個大佢3歲嘅哥哥,由於澳門當年搵食艱難,佢6、7歲隨家人由澳門移民香港,自此一直住喺西灣河太安樓。媽媽來港後工作冇變,繼續做戲院售票員,爸爸就由經營酒店變成喺深水埗開毛衣廠。

雖然事隔幾十年,但當年喺澳門讀培正小學嘅Joseph,仍然難忘喺澳門俗稱「盧九花園」、即係盧廉若公園嘅快樂時光,佢話當年小學位於園內,所以每日返學即係去公園玩。近年澳門經常拒絕泛民議員入境,澳門出世嘅Joseph本應有「免死金牌」,但原來佢一直無申請澳門身份證,所以過去都唔肯定自己入唔入到境,更從未攞過澳門政府派嘅錢。

原來李國麟嘅哥哥退休前,曾經係吉之島高層,但佢從無因此買嘢時攞著數,相信自己唔貪小便宜嘅性格,可能同細個嘅家教有關。

Joseph移居香港後,喺筲箕灣官立中學讀到中五,其後試過去工業學院讀報造船,可惜最終因為開班不成,去咗學打電報,喺當年好出名嘅英國大東電報局打工,連摩斯密碼都識解。但佢做做吓因為嫌悶,改去咗學校做實驗室技術員,之後由於知道做護士可以住宿舍,80年起就入咗行做護士,做做吓就做埋護協主席,2004年起連續四屆當選衛生服務界議員。

唔知大家記唔記得,其實Joseph以前都係長毛,留有一把長秀髮?今年58歲嘅Joseph話,兩年後會喺公開大學教職退休,亦有意喺立法會退下火線,希望交棒畀年輕人,相信到時可以拉返從政後放低咗嘅二胡喎。

一格照片,一個故事,Follow蘋果Instagram!
BannerBanner