【李八方online】退役九巴「丹尼士三鋒」變村校圖書館

更新時間 (HKT): 2018.01.30 17:16
(九巴提供圖片)
(蘋果日報)

九巴又捐巴士喇!佢哋今日捐咗一部退役巴士俾元朗錦田通德學校,希望幫助通德嘅同學仔提升學習興趣,而今次已經係九巴第四次捐出退役巴士俾社區。今次捐出嘅巴士型號,係丹尼士三鋒(車身長10.6米),外觀保持良好。呢架退役巴士將會重新改裝,變成閱讀巴士,仲改咗一個新名,叫「KMB: Kids Miraculous Bus」,校方計劃喺車窗及天花加上繪本嘅人物圖案,並擺放不同類型書籍,希望提供一個良好嘅環境培養學生閱讀習慣,擴闊視野。

校長黃偉立校長話,今次計劃好有意義,透過改裝舊巴士,衷心感謝九巴俾學生有一個閱讀和學習的地方,因為學校好注重閱讀,但一直因為空間不足難以推動。九巴採購部主管林肖連就話,好高興九巴希望退役巴士可以繼續服務香港市民,用另一種方式讓巴士轉化成為教學或其他有意義嘅用途,達至資源循環再用,持續發展。

九巴嘅舊巴士及退役巴士捐贈計劃於2016年底,就開始捐贈退役巴士俾非牟利機構循環再用,捐贈車種包括單層及雙層巴士。如果想申請得到一部退役巴士,申請者須提交計劃書詳述用途,及需要符合可持續發展要求。詳情可瀏覽九巴網頁「商務機會」中嘅「捐贈廊」。

一格照片,一個故事,Follow蘋果Instagram!
BannerBanner