【聽我講...】當熱血校長遇上溫情老麵家 為貧苦學生籌比賽旅費

更新時間 (HKT): 2018.03.24 18:42

一間是走過甲子年的老麵家,一間是曾幾何時瀕殺校的屋邨小學,風牛馬不相及,卻因非常校長洪細君,成了街坊戰友。「學生唔夠旅費出外比賽,有幾多個校長會咁肉緊?我哋義賣盆菜,都係想出少少力」。毗連沙田崇真小學的盛記,兄弟檔老闆大細B哥異口同聲。牢記全校學生名字、為鼓勵閱讀課外書,邀請學生到家作客親自下廚,過去一星期,洪細君又為學生旅費四出奔走:「去美國,成個團隊先可成行。」一個都不能少,這是奇蹟故事,也是一個街坊守望的溫情故事。

記者 呂麗嬋

「好多人做嘢半途而廢,你哋都要好似校長咁,堅持到最後,唔好輕易放棄」。這天,洪校長帶著7個參加創意思維比賽的學生及老師,親身到盛記拜訪,多謝好鄰居幫忙公開籌款。忙不及出外迎接的大細B哥,席間對洪細君仍是讚囗不絕。屋邨小學打低傳統名校,贏得港區冠軍,令人振奮,只是故事未完。「無諗過會贏、更無諗過有機會去美國」。讀小五、最遠只去過海南島的隊員何世龍,很懂事,他說明白家人難負擔旅費,但心情難免如坐過山車。

「見到難掩失望神情,係好心痛。」洪細君說。「創意思維世界賽」源自美國,已有40年歷史,共分兩部份,首部份為團體話劇,第二部份屬「即興題」,每年有來自世界各地的學生隊伍,經地區選拔參賽。沙崇今年以變奏版取西經故事,演釋「經典」這個題目,以創意幽默表達方式爆冷得獎,代表香港5月到芝加哥愛荷華州立大學比賽,可惜屋邨小學的貧苦學生,負擔不了每人二萬多元的旅費,只能望門輕嘆。

肉緊的洪細君,遂在學校專頁發起公開籌款,助學生籌募赴美參賽經費,達成心願。而率先響應的,正是好鄰居大細B哥。「呢幾年見證間學校嘅轉變,真係好感動」。細B哥張文強說。「我哋做飲食嘅,工時出名長,校長每朝早六點幾已企喺學校門口,有時夜晚11點仲見到佢,最難得係佢記得每個學生個名,勤力到我一度以為佢係保母車老闆,過嚟拉生意!」為口奔馳他最明白,但大B哥謂,這個非常校長何止打好一份工,在他心中「直頭係將自己俾咗間學校」。

「以前沙崇只係普通屋邨學校,盛記喺正隔離,學生過嚟食嘢,唔俾錢走咗去;一唔係就你推我撞,話佢就將啲辣椒油同甜醬亂咁溝埋一堆報復,自從洪校長嚟咗,間學校真係翻天覆地,啲家長嚟叩門唔收會喊,以前係派入嚟先喊,你話差幾遠?」快人快語的大B哥說。由收生不足到家長叩門不絕,8年前空降到沙崇的洪細君,確創造了街坊學校的傳奇。「最初係好困難,接收咗鄰校殺校後的學生,而最禍不單行的是訓導主任提早退休,好多老師求去」。洪說。

由零開始推行連串改革,既教過錦繡花園的富貴小學,也走進天水圍教書,與草根學生同行,來到百廢待舉的沙崇出任校長,洪細君推出連串改革,鼓勵學生和老師多參加比賽,又發起創新的閱讀計劃,邀請表現最好的同學,到她位於屯門的家作客,為學生下廚。「最遺憾係屋企最多只夠招呼20人,嗰一年讀咗104本書嘅學生都嚟唔到」。反應踴躍,乾脆預訂雪榚車到學校門口,兔費請閱讀數量達標的學生食軟雪糕,不拘一格,引為一時佳話。

「嚟呢度,我得到好多,完全喜出望外」。帶領學校走上全新軌道,也遇上兩脇插刀的好街坊。「嚟做校長,先認識盛記的大細B哥,知佢哋會定期免費派麵俾老人家食,又會搞講座邀請學生家長去聽,做好多社區公益的事」。洪形容盛記是學校最好的鄰居:「以前我哋小花園好簡陋,佢哋見到竟然幫我哋整到好靚,車軚花架、用玻璃樽做聖誕樹;我哋有個中文老師識彈古箏,想開古箏班但無琴,細B哥又唔知喺度搵到批琴借俾我哋,令我哋感激又感動」。

就是今次比賽,學生不夠旅費成個團隊出外比賽,大細B哥亦二話不說,熱心建議義賣盆菜為學生及老師籌募赴美旅費,兩肋插刀。「佢哋甚至話要代學生俾住報名費先,有信心之後會籌到錢,我哋梗係唔肯,呢啲都係血汗錢,見到佢哋好上心,好感動」。都說香港再沒鄉村,但在毗連巨型商場的瀝源邨,縱然人口老化嚴重,這種近乎失傳了守望相助的街坊情,卻仍濃得化不開,很窩心。

捐款詳情請參閱沙田崇真小學fb專頁: https://bit.ly/2FZq5gt

一格照片,一個故事,Follow蘋果Instagram!
BannerBanner