【八方相當年】港區新人大洪為民 竟然俾立法會考起

更新時間 (HKT): 2018.04.09 15:50

制服誘惑,大人細路沒法擋。新任港區人大代表、前海香港事務首席執行官洪為民(Witman)自細嘅志願係做海軍指揮官,梗係啦,着住制服英姿颯颯,邊個男仔唔鍾意?中三時學校交通安全隊招募隊員,「套制服真係好靚」,心心眼標晒出嚟,奈何父母驚佢冇時間讀書兼有額外支出而反對,制服夢落空,估唔到廿幾歲仔機緣巧合下又加入交安隊,估唔到一做做咗23年位至家陣嘅總監。

父母係電機方面嘅工程人員,生於內地嘅Witman係獨子,10歲來港時確實有唔慣,「內地間屋大香港好多」,初嚟到埗時住喺板間房,其後搬去大口環嘅100呎木屋,「電都係偷(用)、水係用山水,有時跟老豆去附近地盤擔水」。

唔適應嘅當然仲有讀書。佢來港時喺內地跳班讀至中一,由於唔識英文,親戚叫佢喺香港由小五讀起,「明明已經中一,竟然要降兩級,我好唔開心」。咁啱有日同媽媽路過當時仲喺西環嘅鐘聲慈善社胡陳金枝中學,見到外面貼住「招生」,即刻拉住阿媽去敲門,咁啱校長喺度,即時畀中英數三份卷佢做,結果中數俱佳,英文當然唔掂,但校長都肯收佢。

一如唔少新移民,廣東話唔好,一定畀同學笑,Witman話打交呢家嘢,當然試過,因為比同學細,幾乎冇贏過,但好快就同同學混熟,「因為我個人幾『江湖』;好多同學每朝返到學校,都會借我啲功課『參考』,哈哈」。

科科成績都上佳,唯獨英文,「記得有科EPA,用英文教,第一堂就講Legislative Council(立法會),嘩,共產黨國家冇呢樣嘢喎,啲字又唔識解,一頭霧水」。最終選擇克服困難,「每朝起身背字典,背30、40個英文字,不斷惡補」。

中六考咗入鄧鏡波,香港理工學院又咁啱收佢讀數學,「美國有間麻省理工好出名、嗰時又想早啲畢業出身搵錢養家」,讀咗兩個星期中六就入理工,嗰時佢得15歲,相信係理工最年輕嘅學生。

畢業後打過工又創過業,亦係中大歷史系文學碩士、英國赫爾大學工商管理碩士等。48歲嘅佢話好難忘廿歲創業時申請唔到信用咭,一位中學老師知道後竟然幫佢私人擔保兼存咗3萬蚊畀佢,感激生命中遇上唔少貴人,亦深知以生命影響生命嘅重要,所以廿零歲開始參加社會服務,參加半島青年商會、扶輪社同交通安全隊等,仲攞過香港十大傑青。

一格照片,一個故事,Follow蘋果Instagram!
BannerBanner