【聽我講…】你是我的眼 互相扶持成就非常愛情 在黑暗中看到愛

更新時間 (HKT): 2018.04.22 18:20

「我係李軒,人人話我老婆好靚,偏偏我睇唔清楚,但就見到佢美麗嘅內心,好想同佢一齊生活。」「我係Umi,人人話我老公睇唔到,我要照顧佢會好辛苦,但我覺得同佢一齊好幸福。」視障音樂人李軒,與健視新婚太太黃天兒,愛的獨白令人動容。這段黑暗中的愛情,越過高山越過谷,由相識相愛但無人看好,到父母接納信任交托送上祝福,3年開花結果。「只要同心,幾大的困難都可解決」。 互相扶持成就非常愛情,黑暗中看得到的愛,七彩繽紛。

記者 呂麗嬋

「老公!你洗啲白菜仲好多沙呀!」尋常的週六,只剩不足一成視力的李軒,跟新婚太太Umi學洗菜,手忙腳亂。「我嘅目標係跟老婆學到煮番幾味」。這個彈琴叻過煮飯的大男生說。在旁的Umi聞言大笑:「可惜我都係半桶水……」說起聽來像「地獄料理」的獨創住家菜式「燒豬脾仔壽司」,一哄而笑,是小夫妻鬼馬又甜蜜的日常。不放心只看到一團白影的李軒入廚用刀,他就伸長雙手,幫忙生得嬌小的太太在吊櫃攞餐具,互補長短。

就如李軒作曲送給新婚太太的冧歌《笑說愛你》:鳴謝你為我充當雙眼……承諾有痛苦艱難都一起。「一個家庭,梗係要互相分擔」,李軒說。新婚燕爾,總是形影不離。曾獲邀與香港管弦樂團合作,及在張敬軒的演唱會內任伴奏的李軒,教琴為業;至於早年留學日本的Umi,就在一間日本公司工作。小妮子說,新婚後首個大挑戰,是她出差3日:「佢要自己照顧自己,最擔心係煲水,怕佢睇唔到會燙親」。

生於中產家庭的Umi,有一個大5歲的哥哥,由萬千寵愛的掌上明珠,到成為雙職李太和家嫂,這個樂天愛笑的可人兒,仍舊「乜都笑餐飽」。「初時以為會好辛苦,但又唔係,仲可以做自己鍾意嘅嘢」,包括為丈夫下廚,唯一要適應是要很整潔:「佢咩都要度到好四正,連重用嘅環保膠袋,都會摺到起角」。零雜物的家居,李軒直言或與視障有關:「睇唔到,啲嘢都要好整齊,要方便到自己,唔會撞到,又會知放咗喺邊」。

患有先天性視網膜色素病變的李軒,自小已要面對視力衰退壓力。「以前個人收收埋埋,唔係依家咁」。早有心理準備最終失明,注定過不一樣的人生。11歲那年,與小3歲同樣患病的弟弟一同學鋼琴,放大5線譜逐條線數,背每粒音符。「是音樂改變了我!」經歷過失業閒賦在家的低潮,拍youtube放上網與人分享,因緣際會受賞識踏上文化中心的台板,與管弦樂團合作,創出自己的音樂路;也是音樂,讓他認識了Umi,成就一段要贏得別人祝福,便得付出雙倍努力的非常愛情。

「我確實係好幸運!」挽着妻子的手,收起笑臉的李軒認真的說。小倆口的愛情故事,要追溯到3年前的聖誕,Umi直言,最初根本不知李軒看不見,直至同行的表姐提醒,她才恍然大悟。「最初有啲不安,怕唔小心講錯嘢會傷害到佢,好多顧忌,後來先發現佢係異常開朗,會講笑會自嘲,你直接講:車,你都睇唔到,佢都唔會介意」。顛覆了她對殘疾人士的刻板看法,好奇上網看李軒自彈自唱的片段,同樣愛音樂的小妮子既感動又佩服。

「嗰時,真係有啲祟拜偶像嘅感覺」。她大笑。由透過WhatsApp分享音樂到單獨食飯,雙方總有說不完的話題。身邊朋友知她認識了這樣一個音樂人,看不見卻達演奏級,參與鋼琴演奏,都覺得好難得。直至有一天,小倆口認定對方正式拍拖,情況急轉直下。「大家都好驚訝,問點解發展到呢個地步,一面倒反對,覺得如果發展到談婚論嫁,會有好多問題」。向來與家人關係親密,向來痛錫她的媽媽,更嬲得一個月不和她說話,每日以淚洗面。小妮子自言,這是人生中最不開心的日子。

倒是看不見的李軒看得最真,他心裏明白,家人反對,只因愛女心切:「大部份Daddy媽咪都唔會接受嗰女同視障嘅人拍拖,擔心佢冇人照顧,仲要照顧埋另一半,怕佢會好辛苦」。李軒知道家人對Umi很重要,若一味逃避,只會令雙方愈行愈遠。「我同Umi講,一定要主動啲,等屋企人慢慢接受」。每次出外,他總叮囑她向父母匯報行程,又主動邀請女方家人看他演出。「唯有證明到俾佢哋睇,我除咗睇唔到,其實都係一個正常人,有穩定工作,大部份時間可照顧到自己,有能力令Umi幸福」。

Umi記得,那個關鍵的晚上,李軒剛好有音樂劇公演,台上的他在鋼琴前自彈自唱,母親坐在她身旁,漆黑的場館鴉雀無聲,眼角瞄到母親感動的表情,讓小妮子鼻酸酸,一顆心落了地:「或者可以過關了吧?」音樂會後,是首次帶李軒回家食飯,今次見的是黃爸爸:「成餐飯Daddy雙眼未離開過佢,可能想知佢其實點食飯,有咩睇到有咩睇唔到吧」。開朗的Umi大笑。千難萬難,小倆口的努力沒有白費,家長開綠燈,拍拖大半年,認定一個她的李軒,趁女友生日求婚,笑言混亂中忙不及答應的Umi,點頭後才知驚。

「第一時間WhatsApp求婚相俾媽咪,佢ok我哋先識得攬住喊」。愈難愈愛,自知大不同,計劃結婚期間,已主動接受婚姻輔導。用心經營的一個家,窗明几淨,一齊分擔家務,你雙眼看得清楚就負責煮飯,我看不到就負責洗碗和打掃,分工合作。「屋企人依家好鍾意佢,每個週六返屋企食飯,一坐埋位就叫我挾餸俾佢」。Umi說:「下個月我哋會同屋企人去歐洲旅行,希望趁仍然係二人世界,可以去遠少少」。困難天天都多,計劃生兒育女的小倆口卻說不怕:「只要同心,幾大的困難都可解決。」誰說不是?

一格照片,一個故事,Follow蘋果Instagram!
BannerBanner