曾志豪主持《瘋SHOW快活人》爆粗出咗街 港台罰明起熄咪11日

更新時間 (HKT): 2018.07.11 17:26

有網民指,曾志豪在開咪後已公開道歉。他事後表示,當時正熱烈討論一些話題,忘記閂咪,結果說出「大人同細路都唔應該聽嘅說話」,所以向大家說對不起。

節目的Facebook專頁有很多網民留言,正負評均有。有網民話:「又唔係有心嘅,細路未聽過粗口咩?咩咁大件事姐?」、「曾志豪今晚可以放心看英格蘭,明天不用返工」、「豪仔:X你老X乜嘢意思?」、「mic後拗咩拗到爆粗,同埋對邊個講?」、「罪不致死,佢都馬上道歉, 希望高層畀次機會豪仔。」其他網民在Facebook亦分享了相關事件:「這樣質素的電台主持是應該要辭退的」、「這個電台主持公然在大氣電波說粗口,太過份了吧!」

港台機構傳訊及節目標準總監伍曼儀回覆查詢時表示,當時曾志豪因為在兩段宣傳帶之間「開錯咪」、「撳錯掣」,「佢開咗自己個咪」,而當時曾志豪正在做「好忟憎」的事,「(粗口)佢係鬧緊佢自己」,當曾志豪知道「開錯咪」、粗口「出咗街」後,已在節目中兩次道歉。

伍曼儀承認事後收到投訴,會跟進處理,相信通訊事務管理局稍後都會就事件聯絡港台,已在節目後責成曾志豪「表現唔專業」,「佢作為一個咁受歡迎嘅主持,佢咪前咪後都應該要小心自己嘅言語。」對於節目如今在網上無法重溫,伍曼儀稱稍後會上載無粗口「乾淨版」。

伍曼儀傍晚表示,經過港台管理開會後,決定由明日起,停止曾志豪主持節目至7月22日,7月23日(星期一)起會恢復主持節目。伍曼儀指,曾志豪已知悉有關決定,並承認自己有錯,接受有關懲處。

伍曼儀指,雖然曾志豪已在節目中道歉,聽眾的反應亦有正有負,但姑勿論如何,曾志豪也是違反了《節目製作人員守則》,在主持節目時說粗口,表現不專業,故希望透過近兩星期的時間,令他反思今次自己的行為。除了主持周一至周五早上的《瘋SHOW快活人》,曾志豪在星期日也會主持《中女宅男殺很大》,今次「停賽」,也令曾志豪於7月15日(星期日)也不能主持該節目。

曾志豪接受《蘋果》查詢時承認自己做錯,會面對責任接受處分,認為因為忘記熄咪而出錯,「其實都係個好低級嘅錯誤,我自己都覺得無辭可駁,咁豐富經驗嘅主持人唔應該犯呢啲錯」。

他稱當時是與同事在咪後討論不同題目,「咪後有好多情緒」,當時討論至激動時說了一句粗言穢語,當時正想播放宣傳聲帶,卻按錯掣令自己咪後的激昂言論「出街」,雖然已在節目間認真道歉兩次,「但肯定都係唔夠㗎嘞,啲聽眾都好大反應,覺得合家歡時段,細路又放假,覺得受到冒犯及唔開心」,「我哋都覺得係唔專業嘅表現,管理層話暫定做節目一段時間,你要冷靜、好好學習做節目,咁我係接受。」

曾志豪是以「服務提供者」形式受聘於港台,開工才會有糧出,換言之熄咪其間不會獲支人工,他坦言:「呢個(我)都係需要面對,唔單止無開咪機會,都係冇糧出」。雖然港台的熄咪懲處不包括電視節目,但曾志豪稱與團隊商量後,認為不宜於停賽期間主持電視節目,故本周五播出、抖暑前最後一集《頭條新聞》,他不會擔任主持。

一格照片,一個故事,Follow蘋果Instagram!
BannerBanner