【八方相當年】拔「根」小子周炫瑋 喺城門河上划過艇

更新時間 (HKT): 2018.08.06 07:30

上屆2015年區選成功打大佬,喺大埔寶雅拔黃容根嘅新同盟周炫瑋(Paul),今屆再戰難度大增,皆因劃界建議將佢嗰區劃埋包括圍村等,夾埋有公屋、居屋同私樓,大雜燴都幾難打,但佢都奮力而戰。唔知呢股幹勁動力,係咪嚟自佢至愛嘅運動-划艇?

細細已經住喺大埔,現年30歲嘅阿Paul有個細佢3歲嘅妹妹。小學就讀大埔崇德黃建常紀念學校,佢話成績ok,「阿媽督促得好勁,佢虎虎地,考得唔好會罰唔准睇電視,所以都會自律讀書。」升上大埔恩主教書院後,阿Paul發現天外有天,「啲同學太勁」,自言成績只屬中游,而佢一直愛文科,Science相關科目唔算掂,但除咗中史,佢又同時愛數學㗎喎。

查實佢中四時都唔係只顧讀書㗎,參加過近一年嘅划艇會,試過去城門河習訓,但到中五要專注會考,所以放棄咗呢項至愛。最終會考中史攞A,數學則係B,果然係有興趣嘅科目成績好啲,以17分原校升中六,都係繼續活躍於課外活動,例如喺校內嘅班際足球賽攞過冠軍。高考成績則麻麻,佢入咗嶺大讀哲學,其間再重拾划艇興趣。

2010年嶺大畢業後,佢曾經喺NGO任職,其間覺得自己都幾適合做社工,「中六時參加過一啲領袖訓練,識咗啲社工,又幫手做義工,覺得可以幫到人,又啱自己性格」,所以2013年報讀中大社工系碩士,同學包括2011年新晉議員、新同盟嘅鍾錦麟,「當時同學都有啲詫異,乜有個區議員喺度?又唔係老餅嗰啲,係好年輕噃」,傾落發現阿Paul對政策都有興趣,新同盟就向佢招手,最終2014年入黨,喺大埔區深耕細作。

原來當時阿Paul嘅屋企人都對佢從政唔多支持,「佢哋仲要係比較支持民建聯,認為民主派搞事,又覺得我會輸,唔睇好㗎」,自己堅持去馬,最終一擊即中。佢視大埔怡富區地膽、「票王」任啟邦為師傅,話喺對方身上獲益良多;唔知可佢唔可以似師傅咁,喺區選做長勝大將軍?

一格照片,一個故事,Follow蘋果Instagram!
BannerBanner