【李八方online】梁振英又去函《信報》 邊稱感謝又語帶不滿

更新時間 (HKT): 2018.09.19 12:13

正當全城都係關注緊颱風山竹帶來嘅影響,前特首梁振英確實與別不同,繼續大談佢嗰單被指濫權嘅「行李門」事件。

過往曾經向《信報》發律師信嘅梁振英今日喺Facebook自爆,佢早前曾經去函專訪過空勤人員總工會吳敏兒嘅《信報》,向《信報》指出兩個事實,話佢個女嘅行李喺交還前已經通過安全檢查,而機管局曾經指,當年一年內有逾500宗為旅客嘅「酌情送遞」個案。

梁振英邊稱感謝《信報》今日登番呢段資料,但同時不滿文中加咗一段資料,文中話呢逾500宗「酌情送遞」個案係機管局失物認領處物件,與「行李門」性質不同,亦無類似統計。689就話2016年4月25日機管局發嘅詳細調查報告,已經話明呢逾500宗係「送遞」喎。

查實整件事嘅始末係發生喺前年3月28日,梁振英個女梁頌昕乘搭國泰航班去美國三藩市,入閘後發現手提行李遺留喺禁區外,梁太唐青儀與機場人員交涉,要求國泰職員代送行李入禁區,梁頌昕更打電話畀老竇求助,最終獲機管局放行,直至有知情人士投訴揭發事件。國泰港龍空姐其後入稟指控機管局及機場保安有限公司,提出司法覆核,不滿此舉有違乘客及行李需要「同行同檢」嘅一貫做法,高等法院早前裁定空姐勝訴,斥當局做法違規。

一格照片,一個故事,Follow蘋果Instagram!
BannerBanner