【李八方online】梁粉攞娥特出氣?屈穎妍:林鄭令我想起「何不食肉糜」

更新時間 (HKT): 2018.09.19 13:48

「頭號梁粉」、報章專欄作家屈穎妍今日喺報章撰文,批評嘅唔係民主派,而係特首,冇聽錯,係特首,當然呢個特首係林鄭月娥而唔係梁振英。屈穎妍話林鄭日前指 「如果返工時遇到交通困難,打電話給上司就可以了」係風涼說話,「我想起『何不食肉糜』的晉惠帝」,又斥林鄭習慣有專車G4護駕,唔知打工仔上班有多苦。

向來棒打佔中份子相當出色嘅屈穎妍,今次用筆尖狠批林鄭:「敢問特首,如果我這樣說了,老闆回我:『咁你以後唔使返工!』我是不是可以向勞工處索償?不能的話,請別再說這種戲言…趕上班的、排隊等車的,你還可以選擇走哪路、站哪裏嗎?明明此路不通、明知危機處處,為兩餐,打工仔只能犯險。」

屈穎妍仲相當像樣咁,搬出法例鬧爆林鄭:「有人說,特首沒權力要求全港僱主停工,但有句話,叫事在人為。按照勞工法例第509章職業安全及健康條例,在無法提供及維持安全進出工作環境地點的途徑下,勞工處其實有權發出停工令。」佢繼而又反問林鄭,知唔知市面亂局係唔適合返工:「如果你(林鄭)不知狀況,開車出去走一轉吧;如果你不懂民情,到大圍港鐵站聽聽吧,我肯定你會聽到一世最多的粗言…我們的首領只是一個按程序辦事的政務官。」

唔知林鄭又估唔估到,自己會成為屈穎妍嘅出氣袋呢?

一格照片,一個故事,Follow蘋果Instagram!
BannerBanner