【李八方online】瞓身作戰19粒鐘 肥馬西九站老是常出現

更新時間 (HKT): 2018.09.25 14:49
肥馬喺高鐵通車日於西九站全日留守,晚上仲要接待到場視察嘅娥特。易仰民攝

星期日正式通車嘅高鐵西九站,啟用至今三日,會乘搭高鐵嘅市民中,正常地有讚有彈,而唔少市民就算唔係去搭車,都有專登去西九站打咭,唔知佢哋有冇遇到港鐵主席馬時亨?皆因八方聽聞,肥馬為咗高鐵開通瞓晒身,除咗通車前夕喺西九站嘅監測站緊盯各環節運作,通車日亦馬拉松式由清晨5點留守至當晚11點幾,同大隊一齊作戰19粒鐘,除咗負責做親善大使,向乘客送紀念品,以及接待到場視察嘅娥特等,仲要統籌同協調,兼搭高鐵去福田站了解車務安排。據知當日佢都有幫襯「添好運」醫肚,拎籌排隊等咗近45分鐘。

去到噚日,傳媒又見到肥馬喺西九站現身,陪住運輸及房屋局長陳帆巡視;嚟到今日,即係第三日嘞,嘩,乜又係佢呀馬生?繼續再同港鐵高層巡視,期間被傳媒問到有市民話高鐵香港段售票有啲亂時就指,因為好多嘢都需要時間,唔可以只用第一日或第二日售票情況作判斷。

其實因為沙中綫工程問題,肥馬曾兩度向特首請辭,但獲林鄭挽留,以便協助遴選新CEO同善後工作。唔知最後結局會唔會有啲出人意表?但相信肥馬做局長時,都未試過直踩咁多粒鐘,反而做港鐵主席卻有此經歷,世事往往真係奇妙。

一格照片,一個故事,Follow蘋果Instagram!
BannerBanner