【李八方online】多得梁繼昌!商經局政助處女下海 

更新時間 (HKT): 2018.10.21 18:15
馮海容爸爸馮康(右)都有參加喎。

維港泳今朝舉行,一如以往都有唔少政界飛魚落場參加,包括再度參賽嘅勞工及福利局局長羅致光同環境局政治助理區詠芷,以及第三度參賽、事先仲剪咗個短髮迎戰嘅會計界議員梁繼昌。唔講唔知,原來愛好游泳嘅梁繼昌,一直都想組織政界名人隊出戰維港泳,可惜過去參賽嘅立法會議員,例如馬逢國、鍾國斌等都分別以「年紀大」同「無練水」等原因無再參加,佢最終搵咗區詠芷「搭路」,成功搵到首度「處女下海」嘅商務及經濟發展局政治助理馮海容入隊,四人為備戰更曾齊齊練水。

「處男下海」嘅民建聯鄭泳舜玩開三項鐵人,相信維港泳都難唔到佢,佢參加優悠組,以26分鐘游畢全程,原來佢事前每星期練習兩次,今日游水之餘不忘欣賞維港景色,仲鼓勵黨友下年同佢一齊參加。

而據馮海容Facebook照片所見,馮海容爸爸、曾任醫管局新界東醫院聯網總監嘅馮康今日都有參加維港泳,有網民睇到馮海容的泳衣照,都留言「Wow」咗出嚟,讚佢身材「superfit」。梁繼昌賽後則話覺得今日賽事嘅秩序比去年暢順,唯一挑剔係要等兩、三分鐘至搵到位上岸,佢都希望明年可以多啲立法會議員參賽。

一格照片,一個故事,Follow蘋果Instagram!
BannerBanner