【李八方online】職工盟三八婦女節狙擊嫻姐

更新時間 (HKT): 2019.03.08 20:20

今日係三八婦女節,婦女事務委員會晚上喺政府總部舉行慶祝婦女節酒會,早前職工盟踢爆由工聯會前任及現任榮譽會長鄭耀棠、陳婉嫻及林淑儀擔任執委會委員嘅樂群社會服務處,佢哋旗下黃英豪社區服務中心疑利用法律漏洞,拒絕同懷孕嘅合約員工續約,以逃避給予有薪產假福利。職工盟主席吳敏兒(Carol)今晚帶備抗議標語,準備向出席酒會嘅林鄭月娥遞交請願信,要求政府立法保障懷孕合約工。不過,林鄭主持完祝酒儀式後就匆匆走人,Carol唔可以成功將信件交到林鄭手。

不過,今次請願都唔係完全冇收穫,Carol喺會場成功捕獲婦女事務委員會主席陳婉嫻,並向佢遞交請願信,嫻姐仲即場認衰,承認自己機構都出咗事,至於贊唔贊成修例堵塞合約工懷孕不受保障嘅漏洞,嫻姐就冇正面回應,只係叫Carol遲啲上婦委會慢慢傾。而林鄭就喺酒會致辭時話,希望提升女性勞動參與率,並且為女性提供更有利嘅工作環境,唔知佢對修例保障懷孕合約工又點睇?

一格照片,一個故事,Follow蘋果Instagram!
BannerBanner