【李八方online】新世界罕有三代同堂登場 鄭志剛孖住嫲嫲鬼馬合照

更新時間 (HKT): 2019.03.18 20:43
嫲嫲鄭周翠英罕有出席公開活動,身為孫仔嘅鄭志剛一直陪伴在側,仲同嫲嫲鬼馬合照。鄭志剛細妹鄭志雯同老公龐建貽都有捧場。

唔少大孖沙都會回饋社會,好似新世界發展創辦人鄭裕彤,生前都投入唔少資源喺公益同教育活動,家族成員亦成立咗周大福慈善基金,承傳行善精神,中文大學都受惠於鄭家,今日特別舉行「鄭家純國際會議中心」命名典禮,難得一見嘅鄭氏三代同堂場面出現嘞,包括甚少露面嘅彤叔夫人鄭周翠英,可見呢個基金幾咁重要。

話到明係鄭氏家族總動員現身,除咗彤叔夫人,點少得身兼基金名譽主席嘅鄭家純、基金主席鄭家成、第三代鄭志剛、鄭志雯、鄭志明同鄭志亮都現身支持,向來同嫲嫲感情要好嘅鄭志剛,一直坐喺嫲嫲身邊照顧佢,更一度擘大個口,同嫲嫲鬼馬合照。

鄭家純國際會議中心位於中大鄭裕彤樓,今次基金嘅捐款會用於資助一、二樓嘅設施翻新,以建成設備先進又全面嘅會議場地,等中大可以舉辦更多國際級嘅學術會議同活動,促進知識交流。

一格照片,一個故事,Follow蘋果Instagram!
BannerBanner