【生命冇take 2】安慰「唔好諗咁多」無助解困 專家:要畀對方講多啲

更新時間 (HKT): 2019.04.21 06:00
《蘋果》製圖、何嘉亮攝
(蘋果日報)

【蘋果x防止自殺會社會實驗】

如果身邊有人告訴你想自殺時,該如何應對?

香港撒瑪利亞防止自殺會總幹事曾展國表示,若察覺到身邊的人有自殺念頭時,應該要直接找當事人傾談,「但唔好同佢講『唔好諗咁多啦』、『唔好諗儍事啦』,呢啲都係完全幫唔到佢嘅方法,有自殺傾向嘅人其實喺過程中係想搵人協助,所以反而係要畀對方講多啲佢心入面諗緊咩,有咩纏繞住佢,等佢有個出口,好多時如果人哋情緒有出口,會減低咗好多壓力」。

曾展國強調過程應「多聆聽、少判斷」,若最終認為自己不懂如何處理時,應提議對方尋求專業協助,「當然唔係提議完就算,聆聽之後就要同行,就係同佢一齊去搵專業協助,比佢覺得有人會同佢一齊去面對個問題」。

有研究指出,一旦有人選擇以自殺方式結束生命,將會對最少6個人造成直接影響,曾展國表示自殺對他人造成的影響深遠,「亦都會引致呢啲人嘅自殺危機大咗,越親就越大,因為佢哋會自責,覺得自己點解無關心到身邊呢個親人,如果自己做得好啲,或者唔做某啲嘢,或者佢就唔會自殺。另外就係會嬲自殺嘅親友,覺得點解要自殺,好多疑問同質疑,呢個心情係非常複雜,對佢哋嚟講係唔容易過,亦都唔係短時間嘅嘢,可能會纏繞數十年」。

記者 李雨夢

一格照片,一個故事,Follow蘋果Instagram!
BannerBanner