【李八方online】被送中逃亡有竇口 謝偉俊有6個外國物業揸手 有人連環賣樓

更新時間 (HKT): 2019.06.12 00:07
謝偉俊喺賭城拉斯維加斯置業,而且唔係一個物業,而係6個。
(資料圖片)

2047年香港大限殺到,「送中」條例搞到人人自危,一國一制已經近在咫尺,立法會今日開始就《逃犯條例》修訂恢復二讀,由於建制派歸晒邊,霸王硬上弓下過關已經冇懸念,相信有方法、有能力、識諗嘅港人,梗係鋪路移民啦,唔通真係留港建港……又咁講,乜呢度真係仲係香港?但移民都要有個「竇」㗎,《蘋果》翻查69位立法會議員嘅立法會申報資料,約一成人即係9位議員,原來有喺外國置業,建制泛民議員統統都有,換言之一旦大吉利是出咗事,外國樓隨時變咗「逃生門」,冇份投票嘅市民,相信只能羨慕!

曾經係「英國人」、可以喺英國居留嘅立法會主席、經民聯梁君彥,作為立法會之首,身體最誠實,佢申報自己喺英國擁有物業。梁君彥喺2016年因為要登上立法會主席嘅寶座,匆匆放棄英籍。但有權有勢、有錢有樓,要攞返個英國居留權,點會係難事?喺英國擁有物業嘅,唔止梁君彥一個,自由黨易志明、議會陣線毛孟靜、專業議政梁繼昌都喺英國有樓揸手,其中梁繼昌仲申報喺英國有兩個物業添。

美國亦係議員置業熱門國家,資訊科技界嘅莫乃光、實政圓桌田北辰、「西環契仔」謝偉俊,一樣都喺美國擁有物業,其中莫乃光更加表明自己嘅物業喺天氣相當好嘅加州。本來獲建制派推舉做法案委員會主席嘅謝偉俊就最巴閉,喺賭城拉斯維加斯置業,而且唔係一個物業,而係6個,無睇錯,係6個!而佢喺北京都只係得一個物業。唔通呢啲就係建制派對佢「另眼相看、委以重任」嘅原因?

至於港人移民熱點加拿大,喺英國有物業嘅毛孟靜同樣申報喺楓葉國有樓,而早前一度自稱「我無能」嘅經民聯石禮謙,喺假設要離港「逃亡」方面相當有能力,喺加拿大溫哥華有物業。

英、美、加係港人移民熱點,咁年輕人最喜歡嘅日本呢?民主黨涂謹申就申報自己同太太喺日本擁有3個住宅單位,早排聽阿涂講,其實喺日本買樓唔係太貴,同埋佢同身邊朋友喺日本不同地方置業,大家去到邊就住對方嘅物業,咁就唔使煩book酒店啦。

根據資料,身兼行會成員嘅經民聯林健鋒,4月份申報減持南區3個住宅物業連7個車位;3月份,其家族持有嘅大潭道住宅連地皮項目,以3.5億元沽出,幾個月前已做好準備套現一大筆錢,惡法通過都無有怕啦。

一格照片,一個故事,Follow蘋果Instagram!
BannerBanner