【引渡惡法】怒轟民怨源於制度 李柱銘:特首換嚟換去都係傀儡

更新時間 (HKT): 2019.06.16 19:35

6.12當日曾到金鐘示威區的民主黨創黨主席李柱銘指,林鄭必須撤回「暴動」的定性,否則任何參與當日示威的人都被視為參加暴動:「點會係暴動呢?只有少數人同警察衝撞,而且衝撞嘅都係攞把遮咋嘛,係警察扑佢哋咋嘛,又噴胡椒噴霧」。李強調,台灣拒絕提出引渡,修例沒有迫切性,「佢(林鄭)收尾都認啦」,加上中港廿多年來沒有遣返協定,「就係唔信佢(內地)司法制度吖嘛,大陸司法制度冇進步吖嘛」,形容中港間的引渡協議「根本無得傾,傾嚟都冇用」。

對於林鄭拒絕下台,實質是否仍獲中央支持?李稱不願揣測,但指林鄭下台結果也一樣,「換第二個咪又係傀儡,換嚟換去都係傀儡嚟咋嘛,都係聽中央話」,他強調這是制度問題,「長遠只能夠畀我哋人民決定邊個係我哋特首、邊個係立法會議員。現在最大問題係(建制派)立法會議員唔聽民意,特首又唔睬我哋」。

他指今日出來的人是「緊張香港」,指年輕人以最大努力守住香港,「特首唔會守住香港,只會出賣香港,所以佢咪自己出嚟囉」。

前法律界立法會議員吳靄儀亦再上街,她不滿林鄭堅拒撤回修例,僅暫緩立法工作,「更加可惡嘅係話警察做嘅嘢係啱,仲要堅持話我哋啲年輕人暴動,呢啲最令人憤怒」。對於林鄭製造社會撕裂,堅拒下台,吳狠斥林鄭:「面子緊要定整個城市利益緊要?」她重申絕不同意將示威定性為「暴動」,直指:「沒有暴動,只有暴政」。

民陣6.16反惡法遊行

一格照片,一個故事,Follow蘋果Instagram!
BannerBanner