【李八方online】董建華旗下網媒搞「公投」 76%投票人叫林鄭下台

更新時間 (HKT): 2019.06.19 20:11

唔少人都話,當前特首梁振英咁多個月嚟一直冇為娥班子提出嘅《逃犯條例》修訂喺Facebook搖旗吶喊,可想而知呢場風波,真係好大可能係特首林鄭月娥一手掀起,如果真係北京要做呀,689點會唔乘勢抽水,畀啲「政績」阿爺睇吓,以免林鄭獨領風騷?結果竟然係4個月嚟無發聲,繼而就喺林鄭落難時呢,即刻再蒲頭講到好似要打救香港咁喎,唔知係咪想向阿爺顯示,當初突然DQ佢換上林鄭,似乎都唔係一個好選擇囉。

就喺呢個200萬+1人高叫林鄭下台之際,由全國政協副主席、前特首董建華智囊「團結香港基金會」成立嘅網媒「思考香港」,竟然喺佢哋嘅facebook專頁搞網上「公投」,如果就咁睇條題目,真係幾乎以為係民主派陣營搞嘅民調呀,因為佢哋係問:「行政長官林鄭月娥就修例引起社會紛爭,已暫緩並親口向全港市民致以真誠道歉,各位會唔會支持她未來3年繼續施政呢﹖」

投票喺周二下午5點、即係喺林鄭開記招致歉但不下台後進行,今日下午結束,結果有成16.6萬人投票,多達76%投票人士唔支持林鄭留任,支持嘅只有24%,如果咁推算,即係有逾12萬人反對林鄭繼續做特首。唔知呢個「主流民意」結果,係咪曾經抱抱林鄭嘅董生所樂見?

一格照片,一個故事,Follow蘋果Instagram!
BannerBanner