【梁天琦決留低】「果燃台」精選推介《地厚天高》黃台仰李東昇棄保前紀錄

更新時間 (HKT): 2019.07.14 02:15

兩人在旺角騷亂案被控暴動罪,棄保潛逃近年半,原來去年5月已獲德國給予難民保護。英國《金融時報》引述黃台仰稱,他與梁天琦早已有共識,一個走,一個留。原計劃由黃台仰留港服刑,後來梁改變主意留下,因認為這是較佳的策略。

大學畢業後,梁天琦曾患抑鬱,這住劏房的雙失「廢青」一直靠食藥撐住,直至傘運令他覺得「人生忽然變得好有意義」,但11月30日衝擊龍和道失敗,等同「成個運動嘅完結」,之後病情越發嚴重,甚至想輕生。

後來梁天琦學識搵人傾,開始踩單車周圍去找朋友,其中一個踩車對象是黃台仰。傾傾吓就加入了本民前。2015年底,黃台仰問他:「不如參加新東補選啦!」梁天琦自此踏上從政之路。

三人中,李東昇名氣不及兩人,亦有不少港人將梁天琦與「青年新政」梁頌恆混淆。惟其如此,梁天琦與李東昇卻是最要好,他也對李有一種虧欠之感。

當時外面一直下大雨,梁天琦在車上,抱住包包:「中一識佢到依家,依家感覺好差,好似拖埋個好好嘅朋友落水。細細個識佢嗰陣,已經去佢屋企打機,淥麵食,啲嘢依家好似倒帶咁,去過邊度,做過啲乜嘢,倒帶咁。

「以前細個成日通宵打機。有冇聽過《魔獸世界》?以前細個成日通宵打同一個地下城,一齊組隊。依家都係一齊組隊,然後一齊俾人告。真係好好笑。」

2016年7月,梁天琦收到律政司通知,官司打定輸數。「叫黃台仰照顧我屋企人囉,如果佢冇事嘅話。同埋即刻乜嘢都唔想做,哈哈!如果仲有兩年就要入去踎,點解我唔做啲輕鬆啲嘅嘢、開心啲嘅嘢,好好享受埋呢兩年咪算囉。」

2016年是梁天琦人生非常濃縮的一年。年初一「魚蛋革命」被控、新東補選、選立法會被DQ、轉為梁頌恆李東昇助選。2016年9月5日,梁天琦未待點票完畢,已離開點票中心,未幾赴美進修。「好似發咗場夢咁,去到最後得到啲咩?乜嘢都得唔到。我最初嘅目標係要做一個代議士,為民發聲,喺我不久嘅將來都做唔到。

「我做唔到乜嘢扭轉呢個局面,依家可以做嘅就係……」沉默良久,他說:「令到自己更加好。」身邊無數人當時勸梁天琦不要回來。

明明話要趁受審前兩年「做啲令自己開心嘅嘢」,但梁天琦在美國仍然肩負「Chosen one」任務:「去唔同嘅地方見唔同嘅人,講述我哋呢啲要受苦難嘅人嘅故事,爭取更多人嘅同情。」

「呢樣係我唯一可以做嘅嘢。」然後返港。

2017年12月,法庭向黃台仰李東昇發出拘捕令。一個人應訊的梁天琦,封口不談,只稱原打算外遊過聖誕,惜法庭新增不得離港的保釋條件;去年1月,梁承認襲警罪,遭即時還柙,同年6月被判入獄六年。

2016年8月,梁天琦被DQ後,支持梁頌恆李東昇代戰新東。一晚,梁天琦如常為兩人助選。李東昇說:「企喺佢(梁天琦)隔籬反應好好多,因為通常街坊都係認得梁天琦多啲嘅。」梁安慰他:「好快認得你,你喺論壇咁好揪!」相視笑。之後梁嘆道:「爭咁啲,唔係自己選。」李東昇反安慰:「冇辦法,玩到咁大。選都無得選。」梁嘆:「選都無得選,黐線!」李應:「冇㗎喇,玩完㗎喇!」梁笑:「玩完㗎喇!」

「梁天琦」催生於2014年雨傘運動失敗後,政治理念主要為港中區隔、勇武抗爭、主權在民,及不能再提的「香港獨立」。惟傘運失敗後,香港的時間似乎被急速濃縮:一地兩檢、國歌法、大灣區、《逃犯條例》……港中加速融合。

黃台仰李東昇成為「政治難民」,梁天琦與眾被告仍在服刑。2016年梁出戰立法會被DQ後,入稟高院提出選舉呈請。上月底,梁透過律師撤銷呈請。

回想當日,梁天琦為參選,不惜簽「衰仔紙」(確認書),承認擁護基本法,賠上人格仍遭DQ。「最大嘅恐懼,就係你睇住自己漸漸變成嗰啲你唾棄嘅人。」

6月2日,梁天琦28歲,在獄中度過第二個生日。25歲那年,他已覺得自己老了很多:「年紀越來越大就越來越多顧忌。究竟同我同年、其他25歲嘅同學,究竟依家做緊乜嘢呢?呢種比較,間唔中都會有。」

律師預料他將於2022年1月出獄,屆時梁天琦30歲。

一格照片,一個故事,Follow蘋果Instagram!
BannerBanner