【8.5大罷工】旺角雞煲店東撐罷工 「唔堅持就無可能改變」(附罷市商戶名單)

更新時間 (HKT): 2019.08.03 12:28

記者 鍾雅宜

反送中示威浪潮持續近2個月,政府仍漠視民意,網民計劃於8月5日舉行「三罷」,位於旺角白布街的陸陸雞煲火鍋店在7月29日凌晨3時於facebook宣佈:「好X嬲,5/8休息一天」,是鮮有在醞釀期已宣佈罷市的小店。

80後店舖負責人黃先生接受《蘋果》訪問時指,「當日中午開始睇直播,見到件事好心痛,大家都係香港人,唔希望見到流血事件。」他當晚睡不着,看到罷市文宣,與數名股東商議即作決定,「呢啲活動好和平,唔影響人,只係影響自己,點解我唔可以做呢?」

該店曾參與6.12罷市行動,面對經濟不景、今年才因租金昂貴結束了2間分店的陸陸雞煲,黃坦言連串罷市行動對生意定有影響,「又唔係好嚴重」,在追問下他始透露其店聘用約十多名員工,連租金等估計罷市一天約損失5、6萬元。

黃坦言宣佈罷市後,「的確有人響網上留言話以後唔幫襯我哋」,但已非他控制範圍,「每件事都有正有反,即使煮食物出嚟,永遠有人話好食,有人話唔好食,我哋唔係太在意,做嘢過得到自己、過得到人就得。」

他直言做生意應避免以公司名義表達政治立場,但事件已無關政治,只講良知,「我唔知反對嘅人嘅精神狀態,有啲可能好偏激,想燒我間舖,有啲可能想打我,甚至我出鏡都會起我底,但問心無愧,良知叫我做就做,你對付我都無辦法。」

但他稱不少網民特意來幫襯支持他,「其實唔應該支持我哋,如果支持,不如支持而家幫緊我哋嗰班小朋友。」他直言這班「小朋友」犧牲很大,「換轉我係細個,都未必夠膽做佢哋做緊嘅事,有人連食飯都無錢,有人會留守連儂牆。」

已為人父的黃先生曾帶同6歲兒子參與遊行,罷工集會亦將帶兒子參與,「希望畀佢知道發生咩事,係親身嘅通識教育。」他指其店有聘請半工讀年輕人,「佢哋自己養自己,好生性,如果因為遊行示威而返唔到工,咁犧牲自己,我會好支持。」

反送中浪潮至今政府拒退讓,黃坦言的確會感疲倦,「但如果個個都咁諗就死,唔堅持就無可能改變,肯做嘅起碼有一半機會。」他認為最重要需成立獨立調查委員會徹查真相、是否有人問責;政府一天未回應,他仍會以自己方式抗爭,「有罷工仍會參與」。

一格照片,一個故事,Follow蘋果Instagram!
BannerBanner