【李八方online】黃大仙街坊慘食催淚彈 李慧琼遊韓嘆咖啡遭聲討

更新時間 (HKT): 2019.08.04 17:45
右圖金水facebook圖片
(互聯網)

反修例運動嘅星星之火,燎遍十八區,娥特繼續龜縮,建制派繼續埋頭譴責示威者,佢哋係咪活喺平行時空就唔知,但第一大愛國愛港政黨民建聯主席李慧琼就肯定喺另一個時區,事關有網民野生捕獲佢喺韓國首爾嘆咖啡,八方就發現,琼子身在外地都不忘出post譴責噚日有示威者侮辱國旗,但就被網民反過嚟寸爆質問,喺黃大仙街坊無啦啦要食催淚彈嘅時候,「請問尊貴議員去左(咗)邊?」,仲話琼子咁愛國,應該返嚟跳海救國旗啦。

網民金水今日喺fb專頁轉載網友嘅「韓國直送」照片,相中見到身穿深紅上衣,裏裏外外紅到爆嘅琼子,同一名男子喺咖啡廳飲緊咖啡,仲低頭玩緊電話,呢位網友嬲爆爆話噚晚黃大仙居民先食完催淚彈,琼子就喺大賣場嘆咖啡,「畀噚晚喺黃大仙食咗催淚彈而之前投左(咗)民建聯嘅街坊睇:你投左﹙咗﹚咩人?11月一票不投保皇黨!」

唔知身在韓國嘅琼子係咪要證明自己個心放唔低香港,今日都有轉載民建聯譴責示威者侮辱國旗嘅聲明,不過呢顆愛國心得唔到香港人認同,好多網民留言揶揄琼子,「係(喺)韓國嘆梗(緊)既(嘅)議員,唔好扮關心政府」,仲爆粗鬧爆琼子,「黃大仙班老人家比(畀)警察D(啲)催淚彈搞到無覺好瞓,你條XX係韓國歎咖啡!?」八方嘗試過用WhatsApp搵琼子,不過對方唔知係咪掃緊貨,無聽電話。

一格照片,一個故事,Follow蘋果Instagram!
BannerBanner