呢班戴晒頭盔面罩豬嘴、政府同警察口中嘅「暴徒」，返到佢哋自己屬於嘅社區，本來喺新城市廣場嘅一班街坊，即刻好似分紅海咁讓出一條路，幾十個黑衣人係中間穿過，被現場過百街坊夾道歡迎，不斷歡呼拍掌，仲一齊叫「光復香港，時代革命」口號。
呢條片由fb專頁「抗爭少女日記」上載之後，12個鐘之間已經有1.5萬個like、超過6000次share，有成24萬人次觀看。有一位自稱美國CNN記者仲留言，問樓主知唔知道條片邊個影，想取得同意轉載條片添。
噚晚網上又流傳另一條片，拍攝者喺架雙層巴士嘅上層，離遠見到十幾個防暴警察行過，一班乘客已經勁驚，有人即刻爆晒粗落車走，亦都有人好緊張咁叫大家「冷靜」、「唔使驚」。
所謂嘅「暴徒」行過會受到街坊夾道歡迎，本來應該除暴安良嘅警察反而人見人怕。民意係點其實都好清楚，不過如果連八達通都唔識用，又真係可能好少搭港鐵同巴士嘅。
8.31五周年民陣再集結
*推廣生意的競賽牌照號碼：52302-9
