【逆權●講人話】女友撐反送中 被掟煲「港豬」蛻變上前線

更新時間 (HKT): 2019.09.05 00:01

「嗰時自己真係一隻『港豬』,新聞唔開、電視唔睇……唔會理好多時事,打吓機就算。」6月9日晚,90後Rico(化名)如常攤在家打機,女友上街「反送中」後於WhatsApp稱唔開心,「我就覺得冇乜所謂,叫佢唔好唔開心啦」,被斥「事不關己」,小情侶為了「上街有冇用」,由凌晨爭拗到清晨,拖過3個月的手就此分開,一隻「港豬」卻被點醒,政治就是眾人的事。由6.12到立法會外「考察」、6.16人生首次上街,7.1在煲底留守,再在地區發起連儂牆,Rico失去了她,卻找回自己,寄語曾經的同道中「豬」:「只要係攞住香港身份證,都有義務企出嚟,捍衛代表香港嘅價值,反對唔公平嘅條例。」

一身黑衫look的Rico放工後匆匆趕到,右手一塊紗布搶入眼簾,「之前喺尖沙嘴整到(受傷)」,已經不知是第幾晚聲援「手足」了。現從事文職的他自言「紅底」,幾歲大從內地移居香港,自小認知是面對共產黨政權,遊行上街總是鬥不過,「我係覺得做幾多嘢都改變唔到,佢(前女友)就堅持試咗先。」6.9百萬人上街遊行反修例被漠視,沒有上街的「港豬」則被分手,「呢個時候我先開始去了解反送中呢件事」……「原來條例違反一國兩制、港人治港,喺香港犯罪可以送去中國審真係好唔合理」。

6月12日在立法會衝突中於場外考察,「參與比例好少,只係去睇吓」;6月16日隨200萬人潮首度上街,「覺得好震撼,未見過港鐵站塞晒,香港人真係好團結」。繼而再在7月1日於立法會煲底聲援,「人生中第一次推鐵馬,幫手搬物資」,每一腳印更深更實。及至7.21元朗白衣人事件,「嗰日真係好嬲,完全瞓唔着覺,自己好想做啲改變,往後抗爭更越企越前」。他指一直不贊成使用暴力,但也諒解政府不回應訴求及警黑勾結,抗爭者無奈要將暴力升級,政府至少必須撤回修例及成立獨立調查委員會,才會收貨。

Rico之後的故事,跟不少「香港人」一樣,當「手足」有需要,就是他現身之時。那有否因此與前女友復合?「冇喎。」這個戀愛章節,沒有峯迴路轉的結局,惟香港的反修例的運動終章,還未完結,「我覺得如果更多人願意喺運動中付出,係有機會贏到」。用3個月時間,由「港豬」蛻變為「香港人」,Rico着眼的不再只有自己,打過的機,塵封多時,「一放工就落去(支援手足或看守連儂牆),我冇打機好耐咯。」

記者 許偉賢

-----------------------------

美國民主與人權法案集會

一格照片,一個故事,Follow蘋果Instagram!
BannerBanner